O quecemento global é un feito. Co informe mensual da NOAA (Administración Nacional Oceánica e Atmosférica) dos Estados Unidos correspondente a abril de 2018, acabamos de cumprir 400 meses consecutivos con temperaturas por riba da media. O último foi decembro de 1984. É dicir, ningunha persoa menor de 35 anos viviu un mes que fora máis frío que a media que se estableceu desde que hai rexistros.
O gráfico que representa os datos recollidos pola NOAA non deixa lugar a dúbidas. Decembro de 1984, no que as temperaturas foron de 0,1ºC por debaixo da media, xa era unha excepción, porque o anterior mes ‘frío’ fora novembro de 1976, cunha anomalía negativa de 0,05ºC.
Desde entón, todo foron meses cálidos. A maior temperatura superior á media rexistrouse en maio de 2016, cando os termómetros a nivel global estiveron 1,23ºC por riba. Outros seis meses chegaron a superar por riba de 1ºC a media histórica: febreiro de 2016 (1,21ºC), decembro de 2015 (1,12ºC), abril de 2016 (1,08ºC), xaneiro de 2016 (1,05ºC), marzo de 2017 (1,02ºC) e outubro de 2015 (1ºC).
Nestes últimos anos estamos a vivir, sen dúbida, os meses máis cálidos desde que existen datos. E así o confirman os datos da NOAA. Os 50 meses máis cálidos da historia concéntranse nos últimos 20 anos. E deles, 43 rexistráronse nos últimos cinco anos.
