A Domus da Coruña ten en cartel “Xogo de Neuronas”, impulsada polos Museos Científicos Coruñeses. A mostra está dedicada á intelixencia humana, e explora a anatomía e o funcionamento do cerebro. O máis destacable da exposición é a colorida rede neural elaborada con neuronas creadas na súa maior parte por escolares galegos.
A exposición está composta con 13 módulos interactivos que percorren as oito intelixencias, descritas polo psicólogo e profesor da Universidade de Harvard Howard Gardner, e algúns aspectos da anatomía e a fisioloxía do cerebro. A intelixencia, segundo a definición clásica, é una característica innata e permanente. Gardner considera que se pode desenvolver e adaptar á contorna, igual que outras capacidades como a muscular. Asegura que o intelecto é a habilidade que utilizamos para resolver problemas, para elixir o camiño que mellor leva a un obxectivo ou para crear produtos importantes na contorna social.
Foto: Museos Científicos Coruñeses.
Howard Gardner defende que pode haber múltiples intelixencias. A lingüística e lóxico-matemática son as que, desde o mundo clásico, recibiron maior importancia. As seis restantes son a musical, a cinética, a espacial, a interpersoal, a intrapersonal e a naturalista. Gadner afirma que todos as temos e que todas teñen igual importancia para o éxito na vida. O punto diferenciador é o grao de desenvolvemento de cada unha e a súa combinación coas demais.
Ao longo da exposición propóñense actividades que poñen en práctica as diferentes habilidades das personas. Os visitantes poden tentar reproducir nun teclado unha melodía, clasificar unhas figuras terrestres –observando as súas diferenzas e similitudes-, facer un debuxo seguindo as instrucións verbais que lles dá outra persoa ou xogar cun aparello con pulsadores a diferentes alturas que se pulsar o máis rápido posible cando se acenden, entre outros.
Porén, o punto máis destacado e a rede neural elaborada por escolares galegos. Entre marzo e xuño de 2012 os Museos Científicos Coruñeses convocaron o programa de participación “Doa a túa neurona” para a construción de neuronas de forma artesanal. Expúxose como un exercicio de ciencia e creatividade, que servise ademais de homenaxe a Santiago Ramón e Cajal. Participaron 780 persoas, a maior parte escolares de toda Galicia, que construíron 709 neuronas. Con elas creouse esta rede neural que preside esta nova exposición producida polo Concello da Coruña.
