Podería ser Marte un planeta con condicións axeitadas para a vida? Arredor desta cuestión xirará a charla que este xoves 12, ás 19 horas, impartirá o astrofísico Borja Tosar no planetario da Casa das Ciencias da Coruña.
Marte é o planeta máis próximo á Terra, e tamén o máis parecido ao noso fogar. Con todo, se un astronauta baixase dunha nave espacial á súa superficie sen a protección axeitada, tardaría apenas 20 segundos en esvaerse pola ausencia de osíxeno e só uns poucos minutos en morrer.
Na súa conferencia, Borja Tosar, Master en Astrofísica pola Universidad de Valencia, abordará as razóns polas cales atrae tanto Marte e todo o que o rodea. Falarase das claves para vivir neste planeta e se hai posibilidade de, a través de enxeñaría planetaria, transformar a súa superficie para facelo habitable, nun proceso que os expertos coñecen como terraformación.
A entrada será libre ata completar o espazo dispoñible no Planetario.
