Os científicos non deixan de lanzar advertencias. A inxente cantidade de plástico que botamos ao mar vai camiño de converterse nun problema medioambiental irreversible. Peixes e mamíferos mariños que morren a moreas atrapados nestes compostos, ou despois de inxerilos, confundíndoos con alimento. A resposta cidadá é tamén cada vez maior, como as iniciativas que avogan por reducir o uso de plásticos na nosa vida diaria.
Neste senso, o Aquarium Finisterrae dos Museos Científicos Coruñeses acolle, desde comezos de ano, a mostra Mar de Plástico, producida pola asociación Mar de Fábula e o colectivo artístico Retoque Retro. Son 85 obras artísticas realizadas a partir das grandes cantidades de lixo que estas entidades recolleron nas súas actividades de concienciación polas costas galegas.
Mar de Fábula é unha asociación sen ánimo de lucro que adoita organizar xornadas de limpeza de praias e outras iniciativas de sensibilidación sobre o problema que supón o lixo mariño. Ao longo destes meses, os membros da entidade están a impartir talleres experimentais e conferencias relacionadas coa exposición.
A súa actividade está incluída no Programa Obxectivo 14 do Aquarium Finisterrae, que engloba as exposicións, actividades e talleres do museo destinadas a contribuír a cumprir os obxectivos da Axenda 2030 da ONU relacionados coa conservación do océano.
A exposición, que permanecerá aberta ata finais do mes de xuño, pode visitarse no horario de apertura do Aquarium Finisterrae (de luns a domingo, de 10 a 19 horas).
