Para conmemorar o Día Internacional dos Museos, os tres Museos Científicos Coruñeses celebran unha xornada gratis este xoves 18 de maio desde as 11:00 ata as 19:00 (o Aquarium Finisterrae pecha o acceso ao público ás 18:00).
As persoas que se acheguen a calquera dos tres centros neste día poderán visitar as súas exposicións e participar nas actividades e proxeccións programadas, sen ningún custo.
O Día Internacional dos Museos celébrase en todo o mundo o 18 de maio desde que, en 1977, o Consello Internacional de Museos (International Council of Museums, ICOM), propuxese esta actividade na súa XII Asemblea Xeral celebrada en Moscova.
O obxectivo do Día é achegar os museos á sociedade e o público en xeral, en resposta a un concepto de museo como institución cultural e histórica ó servizo da sociedade e do seu desenvolvemento. A resolución do ICOM di: “Os Museos son un importante instrumento para o intercambio cultural, o enriquecemento das culturas e o avance do mutuo entendemento, da cooperación e da paz entre os pobos”.
