O vindeiro sábado 17 de xuño volve unha nova edición da actividade A trastenda do Aquarium Finisterrae, pensada para un público maior de 16 anos e que ofrece a posibilidade de coñecer, da man do persoal técnico do acuario coruñés, as instalacións necesarias para o control e manexo dos millóns de litros de auga mariña que pasan diariamente polos seus tanques. Durante dúas horas, de 11.30 h a 13.30 h,  realizarase un percorrido polas salas de bombeo e de filtración; o laboratorio; a cociña; as corentenas; e a sala de cultivos auxiliares.

Tamén será unha oportunidade para descubrir os principais recursos que se empregan para manter as condicións biolóxicas e ambientais adecuadas para os seres vivos que alberga o centro. A visita está concibida ademais para responder en directo á curiosidade cidadá sobre o funcionamento do Aquarium Finisterrae. É preciso facer reserva previa e as entradas para participar en A trastenda do Aquarium Finisterrae, por un importe de 10 euros, poderán adquirirse desde as 10 horas do mércores 14 de xuño desde a web dos Museos Científicos Coruñeses. Cada mes programarase esta actividade para un máximo de doce persoas por edición.

Un mes cheo de actividades

Para o mes de xuño, o Aquarium programa outras actividades para entreter aos máis pequenos da casa. Unha das súas actividades máis consolidadas é Aventura coas focas, un taller de divulgación científica para coñecer de primeira man a rutina diaria das focas que viven nas piscinas exteriores. Durante os 90 minutos que ocupa a actividade participarase na preparación dos alimentos e accederase ás plataformas exteriores onde se alimenta e revisa o estado destes mamíferos mariños. Esta actividade está dirixida aos maiores de 7 anos, que en xuño poderán desfrutala esta fin de semana (10 e 11 de xuño) e a que vén (17 e 18 de xuño).

Amais da Aventura coas focas, esta fin de semana organízase un obradoiro de arte efémera no Aquarium. Esta actividade está pensada para concienciar a cidadanía sobre o gran problema ambiental que é a contaminación dos océanos con plásticos. A partir dunha diversidade de refugallos recolleitos en praias galegas, os participantes poderán crear pequenas esculturas sobre peixes e outros animais mariños, tanto reais como imaxinarios. Os talleres estarán guiados polo colectivo Retoque Retro e a Asociación Mar de fábula.