A Domus da Coruña acolle este mércores a clausura da cuarta edición do Mes Escéptico, un ciclo de charlas organizadas polos Museos Científicos Coruñeses e a entidade Circulo Escéptico, co obxectivo de ofrecer unha reflexión crítica sobre diversos temas de interese social e científico.
A partir das 19.30 horas, o salón de actos do museo coruñés celebrará diversos actos. O primeiro deles será o nomeamento do ministro de Ciencia, Pedro Duque, como socio de honra do Círculo Escéptico, “pola súa decidida defensa da racionalidade fronte ao auxe das pseudoterapias”, segundo decidiu a directiva da entidade. Duque intervirá a través dun discurso gravado que será emitido durante o acto.
A continuación celebrarase a última charla do ciclo que se veu celebrando este mes, centrado na infancia. O psicólogo Eparquio Delgado abordará os riscos das adiccións que pode agochar internet, comparándoas con outras adiccións, especialmente no caso dos adolescentes, e ofrecendo ferramentas para achegarse a este abuso.
Premios Pepe Cervera e Pérez Cobo
A clausura da actividade servirá tamén para entregar os premios Pepe Cervera ao pensamento crítico, e o Pérez Cobo, de Xornalismo e Pensamento Crítico. O primeiro deles recaeu en Lucía Galán, pediatra e divulgadora que destaca, segundo subliña o xurado, composto polos socios do Círculo Escéptico, “pola súa constante defensa da evidencia científica en medicina fronte as pseudoterapias e os movementos antivacinas”.
O premio é unha homenaxe a Pepe Cervera, paleontólogo e divulgador falecido este ano, que destacou pola súa paixón á hora de transmitir o coñecemento e as súas capacidades transformadoras, a divulgación da ciencia e o dereito de todos os cidadáns a gozar dela.
Pola súa parte, a xornalista de El Mundo Marta Ley recibirá o III Premio Pérez Cobo polo artigo El placebo más caro del mundo, un traballo sobre a historia da homeopatía en España. O xurado estivo composto por Ángela Bernardo, gañadora da edición anterior, os xornalistas Manuel Rey e Olga Pereda e os Socios do Círculo Escéptico César García Pérez e Manuel F. Herrador.
