O coñecido como permafrost, unha capa de solo xeado que é clave nos ecosistemas do círculo polar ártico e amplas zonas do norte de Europa, estase derretendo. A súa degradación avanza nos últimos anos, e en zonas como Alaska e Siberia Oriental (especialmente na rexión de Yakutsk) teñen serios problemas para reparar os danos que xa produce este desxeo.
Un estudo realizado pola universidade de Oulu, en Finlandia, e publicado en Nature Communications, analizou o problema que o derretemento do permafrost podería causar nos vindeiros anos nas rexións árticas. No traballo identifícanse as zonas con maior risco, cuantificando as estruturas en perigo e comparándoas cos diferentes escenarios de cambio climático que se prevén.
Un 70% das infraestruturas, en perigo
Os investigadores avaliaron os riscos das estruturas de enxeñería para 2050. E os resultados son contundentes: “Preto de catro millóns de persoas e o 70% das infraestruturas de transporte e industriais actuais están en zonas cun alto potencial de desxeo do permafrost”, mesmo se as emisións de gases de efecto invernadoiro se estabilizaran ou se reduciran, din os autores. Estas cifras supoñen que preto de tres cuartas partes da poboación panártica verían seriamente alterado o seu modo de vida.
O desxeo do permafrost afectaría tamén á explotación dos recursos naturais, moi importantes nalgúns puntos do círculo polar ártico, e para o desenvolvemento sustentable destas comunidades. Así, os científicos alertan de que o 45% dos campos de extracción de hidrocarburo no norte de Rusia están en rexións inestables porque o permafrost se está derretendo. Urxe, por tanto, segundo o estudo, a necesidade de ter unha información precisa para abordar o problema.
