O 5 de xuño de 1799, hai agora 218 anos, o explorador alemán Alexander von Humboldt comezaba no porto da Coruña unha colosal aventura científica que o levaría a percorrer Sudamérica. Navegou o Orinoco e o Amazonas e subiu ao volcán Chimborazo, entre outras xestas, ademais de realizar grandes descubrimentos no eido da oceanografía, o magnetismo terrestre, a flora e a fauna. Para celebrar o bicentenario daquela efeméride, en 1999 abría as súas portas na Coruña o Aquarium Finisterrae, a Casa dos Peixes. Coa apertura deste museo, A Coruña tiña por fin un museo dedicado á divulgación do medio mariño, tan importante para a súa historia.
Situado a carón da Torre de Hércules, o acuario coruñés conta con varias estancias que permiten mergullarse na vida mariña. Unha das súas principais atraccións é a sala Nautilus, inspirada no submarino do capitán Nemo de Julio Verme. As paredes da sala son un enorme vidro a través do que se ven peixes de 50 especies. No Aquarium Finisterrae tamén é posible ver en directo algúns mamíferos mariños, como as focas, ou coñecer moitas curiosidades do mar na sala Maremagnum, a estancia principal, de máis de 1.600 metros cadrados, ocupada por uns 80 módulos interactivos.
