A finais de setembro, un home que se encontraba a bordo dunha embarcación na parte interior do dique do porto de Punta Langosteira, en Arteixo, rexistrou unha imaxe sen precedentes: un exemplar de tiburón branco (Carcharodon carcharias) duns cinco metros de lonxitude que supoñía o primeiro rexistro da emblemática especie nesta zona do Atlántico. Menos de 20 días despois, repetiuse un avistamento que é moi pouco frecuente (non había citas confirmadas con tanta claridade coma estas nesta zona do norte da península ibérica): un pescador que se atopaba a 10 millas da costa de Ribadesella rexistrou este sábado 16 outro xigante branco.
O diario El Comercio, que entrevistou ao pescador, recolle o seu relato. “Cando me pasou por baixo xa vin que non era un marraxo; era gris por riba e branco por baixo, impresionante”, conta Juan Carlos González, que destaca como o animal chegou a bater co casco da embarcación.
Expertos consultados polo mesmo xornal contemplan a posibilidade de que se trate do mesmo animal avistado no porto exterior da Coruña. O presidente da Coordinadora para el Estudio y la Protección de las Especies Marinas (Cepesma), Luis Laria, cre que é “case seguro” que o animal que navegou por augas galegas continuase o seu periplo ata ser avistado no oriente asturiano. Pola súa parte, o director do Centro Oceanográfico de Gijón, Rafael González-Quirós, lembra que os únicos rexistros son o da Coruña e outro realizado anos atrás no Mediterráneo.
