Os osos pardos tamén son fotoxénicos

Zack Clothier gaña o premio Wildlife Photographer of the Year do Museo de Historia Natural de Londres por unha imaxe nun bosque de Montana

A foto gañadora na categoría
A foto gañadora na categoría "Animals in ther Environment". Foto: Zack Clothier

Insólito. Un oso pardo mira directamente á cámara, talvez preguntándose que fai un aparello tan curioso no medio do bosque. O que máis chama a atención é a escena situada ás súas costas: un cadáver de alce medio cuberto pola neve. Así é a instantánea que sacou Zack Clothier, un fotógrafo estadounidense que acaba de ser galardoado co Wildlife Photographer of the Year do Museo de Historia Natural de Londres na categoría “Animals in their Environment” por unha impactante imaxe dun oso pardo.

Clothier colocou a cámara no inverno do 2019-2020 nun bosque próximo á súa casa en Montana. O aparello quedou alí durante dous meses, posto que funciona a través dun sensor que, ao detectar movemento, captura as imaxes. Cando o fotógrafo volveu a ese lugar, o aparello estaba no chan, rabuñado e con babas do oso. Segundo se pensa, o sensor debeu disparar a cámara no momento no que o animal estaba atacando e comendo o alce. E logo, ao facer ruído, o oso asustouse e atacou tamén o aparello. Mais seguiu funcionando e iso permitiu recuperar a última foto: a gañadora do certame, titulada “Grizzly Leftlovers”.

O fotógrafo, Zack Clothier, está especializado en fotografía de natureza, paisaxes e vida silvestre no oeste americano. O seu traballo apareceu en diversas campañas publicitarias, publicacións e exposicións de todo o mundo. Así o describen na páxina do Museo de Historia Natural de Londres que, un ano máis, premia ás fotografías que mellor saben capturar a natureza. Sen trampa nin cartón.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.