Un estudo realizado por científicos do Instituto de Investigacións Mariñas de Vigo (CSIC) salienta o carácter caníbal dos polbos, un comportamento que xa fora gravado en augas das illas Cíes, na ría de Vigo, e agora nun novo vídeo en augas do Caribe.
Octopus cannibal attack in Bahamas pic.twitter.com/N96vPL9RMQ
— Jorge H. Urcera (@JorgeUrcera) August 21, 2019
O traballo, publicado este mes de agosto na revista Journal of Molluscan Studies, está firmado por Jorge Hernández Urcera, xunto a Ángel Guerra e a Manuel E. Garci, todos eles do IIM vigués. Leva por título “Ataque caníbal por Octopus vulgaris na natureza: comportamento de depredador e presa”.
O traballo salienta que o canibalismo está moi espallado entre os cefalópodos e que contribúe “á eficiencia reprodutiva e a supervivencia dun depredador, por exemplo na eliminación de competidores futuros, subministración inmediata de nutrición de alta calidade con proporcións óptimas de vitaminas, minerais e aminoácidos”.
O novo vídeo amosa un polbo nun ataque caníbal. Foi gravado por Shane Gross. Previamente, estes mesmos investigadores xa conseguiron imaxes de canibalismo entre polbos en liberdade en augas das illas Cíes, como se pode ver neste outro audiovisual:
Os científicos do Instituto de Investigacións Mariñas (IIM) de Vigo foron os primeiros no mundo en gravar o canibalismo do polbo en plena natureza. Aconteceu en augas das illas Cíes en tres ocasións: o 11 de decembro de 2012, o 13 de xullo de 2013 e o 26 de novembro do pasado ano. A análise das imaxes permitiu obter interesantes conclusións: “O canibalismo dáse entre polbos de diferente idade e tanto en machos como en femias, ademais os exemplares atacantes seguiron un patrón de comportamento común despois de realizar as súas capturas”, relataba tras este primeiro éxito Jorge Hérnandez Urcera, do Grupo de Ecoloxía e Biodiversidade Mariña (Ecobiomar) do IIM.
Urcera ten gañado diversos certames de vídeo de natureza submarina, ao igual que o investigador e realizador Manuel E. Garci.
Aquí tes acceso ao artigo recén publicado o 6 de agosto de 2019
