Un equipo de investigadores galegos acaba de publicar un estudo na revista Marine Pollution Bulletin que aumenta, se cabe, a preocupación sobre a contaminación por mor dos microplásticos. A investigación, na que se analizaron 35 contidos do estómago de golfiños comúns (Delphinus delphis), a especie máis frecuente en augas galegas, atopou microplásticos no 94% dos golfiños varados en Galicia entre os anos 2005 e 2010.
microperla (C).
Este traballo, no que participaron o Instituto Español de Oceanografía (IEO), o Instituto de Investigacións Mariñas (CSIC), a Cemma e as universidades de Aberdeen e Aveiro, “pon de manifesto que a presenza de microplásticos afecta xa a todos os elos da cadea trófica mariña”, segundo os autores. Ata o de agora estudáranse estes fragmentos en zooplancton, crustáceos, peixes, tartarugas ou aves, pero non se abordara desde Galicia o caso dos mamíferos mariños.
No artigo indícase que se atoparon un total de 411 anacos de microplásticos, cunha media de 12 por cada contido estomacal, e cun tamaño medio de 2,43 milímetros. Identificáronse tres tipos: fibras en forma de filamentos ou fíos; fragmentos con forma de partículas irregulares, labras ou escamas, e microperlas, con forma de esferas.
O estudo atopou 411 anacos de plástico (12 por cada contido analizado), cun tamaño medio de 2,43 mm
Debido ao pequeno tamaño, os microplásticos non afectan fisícamente aos golfiños cando os inxiren, algo que si acontece cos fragmentos de maior tamaño. Porén, o perigo está nos contaminantes adheridos a estes anacos microscópicos (PCBs, DDT, BPA, metais pesados…) que poden pasar a outros sistemas do organismo dos golfiños e afectar á súa saúde, “provocando problemas endócrinos ou alterando a homeostase”, explican os investigadores.
Ademais, segundo as investigacións máis recentes ao respecto, é probable que os microplásticos veñan xa das inxestas dos elos inferiores da cadea trófica, dos que se alimentan os golfiños, que incorporan estes materiais mediante a filtración da auga ou das súas propias presas. Así, os microplásticos acumúlanse ao longo da cadea ata chegar aos depredadores superiores.
As mostraxes tomáronse a partir dos golfiños recollidos pola Rede de Varamentos de Galicia, que coordina a Cemma co financiamento da Dirección Xeral de Patrimonio Natural da Xunta de Galicia.
