Hoxe da comezo a campaña SECON 16, cuxo obxectivo é a toma de mostras de sedimentos na plataforma noratlántica española. 10 científicos e técnicos do Instituto Español de Oceanografía (IEO) liderarán esta campaña a bordo do buque Ramón Margalef que partirá de Vigo e terá unha duración de 12 días.
Durante a campaña tomaranse mostras de sedimentos superficiais en máis de 75 estacións situadas ao longo de transectos perpendiculares á costa chegando a estacións a máis de 500 m de profundidade. O obxectivo da mostraxe é a posterior avaliación do contido en contaminantes e microplásticos nos sedimentos, así como estudo dos posibles efectos biolóxicos asociados á contaminación presente nos devanditos sedimentos.
Tomarán mostras de sedimentos superficiais en máis de 75 estacións
Esta campaña realízase con periodicidade quinquenal e os datos que se obteñan como consecuencia da análise dos sedimentos desta campaña serán usados para a avaliación nacional e internacional do estado do medio mariño na rexión noratlántica en foros tales como a comisión OSPAR ou a Directiva Marco de Estratexias Mariñas.
O Instituto Español de Oceanografía (IEO), é un organismo público de investigación (OPI), dependente da Secretaria de Estado de Investigación, Desenvolvemento e Innovación do Ministerio de Economía e Competitividade, dedicado á investigación en ciencias do mar, especialmente no relacionado co coñecemento científico dos océanos, a sustentabilidade dos recursos pesqueiros e o medio ambiente mariño. O IEO representa a España na maioría dos foros científicos e tecnolóxicos internacionais relacionados co mar e os seus recursos. Conta con nove centros oceanográficos costeiros.
