Xoves 28 Marzo 2024

Científicos do IEO investigan a presenza de toxina paralizante nas rías de Vigo e Pontevedra

O equipo que traballa no proxecto Remedios estuda desde o pasado 29 de xuño este fenómeno a bordo do buque "Ramón Margalef"

Científicos do Instituto Español de Oceanografía (IEO), en colaboración con investigadores do Ifremer de Brest (Francia) e o Instituto de Oceanografía Scripps (California, Estados Unidos) desenvolven desde o pasado 29 de xuño a campaña Remedios 2018 a bordo do buque Ramón Margalef, que partiu do porto de Vigo. Ata o 18 deste mes, desenvolverán investigacións nas rías de Pontevedra e Vigo sobre a relación da aparición de toxina en algas coas propiedades físicas das augas.

Enrique Noguera, investigador do IEO e xefe da campaña, explica que as precipitacións de xuño obrigaron a reformular o obxectivo da investigación. “Ía ser unha campaña enfocada ás proliferacións de Dinophysis (toxina diarreica) e de Pseudo‐nitzschia (toxina amnésica), pero a meteoroloxía é caprichosa. As chuvias deron lugar a un fenómeno pouco frecuente: a proliferación de Alexandrium minutum (toxina paralizante), normalmente confinada na badía de Baiona, na Ría de Vigo, dando lugar á formación dunha chamativa marea vermella no entorno da praia de Samil, e acadando concentracións elevadas na Ría de Pontevedra”.

Publicidade

Un dos aparellos de medición empregados na campaña Remedios. Fonte: IEO.
Un dos aparellos de medición empregados na campaña Remedios. Fonte: IEO.

A investigación enmárcase no proxecto Remedios, que ten por obxectivo estudar os procesos hidrodinámicos de micro-escala que afectan a aparición de algas tóxicas nas Rías Baixas. Estes procesos determinan que estes organismos acaben agregándose en capas finas de un a tres metros de espesor, que actúan como unha “alfombra tóxica“, contaminando os mexillóns das bateas en diferentes graos, dependendo da profundidade á que se formen.

Ata hai uns anos, explican desde o IEO, era imposible medir con precisión estes procesos hidrodinámicos, pero os avances tecnolóxicos das dúas últimas décadas permitiron o desenvolvemento de instrumentos de alta resolución vertical para medir as propiedades físicas da auga do mar e a velocidade e dirección das correntes de auga. Aparellos que realizan mostraxes de turbulencia, escala fina ou sondaxes multiparamétricas están sendo empregados nesta campaña Remedios.

Remedios, unha iniciativa multidisciplinar financiada polo programa estatal de I+D+i “Retos da sociedade”, combina información relativa ás condicións meteorolóxicas, as observacións das condicións físicas do mar a escalas de metros e as análises no laboratorio para deseñar modelos que axuden a predicir con maior precisión as distintas etapas dos episodios de presenza de algas tóxicas.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A Serra da Capelada foi un glaciar da última Idade do Xeo: “É un caso singular en toda a península”

O traballo do catedrático e investigador da USC Augusto Pérez-Alberti analiza a súa configuración xeomorfolóxica e a paisaxe

As plantas non nativas aceleran a desaparición dos ameneiros galegos

As árbores centroeuropeas que se importan para restaurar as plantacións afectadas por unha doenza fúnxica producen uniformidade xenética

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

Primeira imaxe en luz polarizada do burato negro da Vía Láctea

Grazas a esta nova vista de Saxitario A*, a rede global de radiotelescopios EHT revela a existencia de fortes campos magnéticos xirando arredor do seu borde