Un equipo de tres investigadores e dúas investigadoras do Centro de Investigacións Mariñas (CIM) da Facultade de Ciencias do Mar da Universidade de Vigo partirá a próxima semana cara ao golfo de Cádiz para participar a bordo do buque Ángeles Alvariño na campaña Inpulse-0719, cuxo obxectivo é estudar a interacción dos procesos oceanográficos e sedimentarios no noiro continental e a súa influencia sobre os hábitats desta zona, prestando especial atención á interacción da denominada Auga Mediterránea de Saída (MOW) coas formas de fondo presentes no noiro superior e medio.
A campaña está asociada ao proxecto Inpulse (Interación de procesos oceanográficos e sedimentarios no noiro continental: implicacións ambientais e nos hábitats), no que participan numerosas institucións estatais e estranxeiras e que está financiado polas axudas a proxectos de I+D+i correspondentes ao Programa Estatal de Investigación, Desenvolvemento e Innovación. Coordinado por Luis Miguel Fernández Salas, do Instituto Español de Oceanografía, que será tamén o responsable desta campaña, o proxecto consta de dous subproxectos, un dos cales –o subproxecto2- está liderado polo grupo de investigación de Oceanografía Xeolóxica e Bioxeoquímica da Universidade de Vigo, equipo liderado polo decano da Facultade de Ciencias do Mar, Miguel Ángel Nombela, e do que tamén forman parte o resto de investigadores que van participar na campaña: Irene Alejo, Guillermo Francés, Anxo Mena e Marta Pérez.
Futuros cambios ambientais
O traballo de campaña realizarase en varias zonas, espazos que se estudarán dende un punto de vista multidisciplinar, usando metodoloxías clásicas e innovadoras para a adquisición de datos batimétricos, un amplo conxunto de variables ambientais e características do sedimento do fondo mariño. Entre as técnicas que se van a usar, destaca o uso dunha zorra que permitirá obter imaxes en vivo do fondo mariño. “O emprego conxunto de toda a metodoloxía, a aproximación multidisciplinar ao medio e o estudo de alta resolución de determinadas áreas do golfo de Cádiz confiren un carácter innovador e pouco frecuente a esta campaña”, explican os responsables da campaña.
Os datos obtidos na campaña Inpulse-0719 servirán para definir como se produce o desbordamento da saída da auga mediterránea (MOW) polo estreito de Xibraltar e os procesos oceanográficos e sedimentarios asociados á súa entrada no golfo de Cádiz e posterior dispersión. “A interacción das diferentes masas de auga é importante por varios motivos, entre eles, a existencia e desenvolvemento de hábitats específicos ou a súa repercusión nas actividades económicas que usan o fondo mariño para o tendido de cables, gasodutos, explotación de recursos, etc.”, apuntan desde o equipo de coordinación.
O estudo inclúe tamén a elaboración de modelos numéricos baseados nos datos reais, que poden ser a chave para predicir desenvolvementos futuros en situacións de cambios ambientais profundos. “O estudo da MOW, a súa interacción con outras masas de auga e as súas implicacións no medio mariño ten moita importancia por numerosos motivos, entre os que se pode incluír a súa influencia global nos procesos climáticos e oceanográficos, implicacións nos hábitats e a súa repercusión económica”, recalcan os investigadores.
30 especialistas de institucións nacionais e estranxeiras
De carácter moi multidisciplinar o proxecto Inpulse involucra a un total de 30 investigadores e investigadoras procedentes de diferentes organismos, entre eles as universidades Royal Holloway (Londres), Cádiz e Málaga; os centros do IEO de Málaga, Cádiz e Madrid; o Instituto Andaluz de Ciencias da Terra-CSIC (Granada) e o NOC (Southampton), Royal Dutch Shell e o Instituto Petroleum Engineering (Reino Unido), entre outros. Estas institucións engloban un conxunto de especialidades entres as que se inclúen a xeoloxía mariña, a oceanografía física, a ecoloxía bentónica, as matemáticas aplicadas e a enxeñaría acústica e da comunicación. Ademais, o proxecto conta co apoio de varias empresas e entidades, como Enagas, Gas Natural e a Sociedad Anónima de Electrónica Submarina (SAES).
