O Colexio Oficial de Biólogos de Galicia, en colaboración co Parque Nacional Marítimo-Terrestre dás Illas Atlánticas de Galicia e o Centro Oceanográfico de Vigo, continúan cos labores de limpeza e sensibilización contra o lixo mariño na contorna do Parque Nacional, motivo polo cal organizan para as dúas últimas fins de semana deste mes de setembro senllas xornadas de limpeza que levarán a cabo nos lugares de máis difícil acceso do arquipélago de Ons.
Para o domingo 22 de setembro está prevista a primeira das intervencións, unha xornada que focalizará as súas actuacións en varias das furnas da illa de Ons, e na que participarán tanto membros do Espeleo Club Aradelas, como de SpainKayak e do Club de Kaiak Mar de Bueu.
O domingo 29 de setembro será a quenda dos submarinistas do Club de Mergullo Croa Foto-Sub, Centro de Mergullo Portosub e Club Subacuático Pérez Sub, que se mergullarán nos fondos do arquipélago para retirar todas e cantos lixos mariños se atopen durante as inmersións programadas.
Estas actuacións puntuais de limpeza na contorna do Parque Nacional súmanse a outro tipo de actuacións levadas a cabo pola organización das mesmas, como a recente estrea da curtametraxe “Ponlle Remedio” unha peza audiovisual que pretende concienciar á cidadanía para tratar de poñer freo no posible a este gran problema dos lixos mariños, e que en apenas un mes desde a súa estrea nas redes sociais e webs do Colexio de Biólogos e Parque Nacional, conta xa con máis de 30.000 reproducións.
Todas estas actividades intégranse dentro da liña de actuacións que desde principios de ano vén realizando a II Rede para a Recuperación dos Ecosistemas Mariños no Parque Nacional Marítimo-Terrestre das Illas Atlánticas de Galicia, un importante proxecto de loita contra o lixo
mariño que conta coa colaboración da Fundación Biodiversidad, do Ministerio para a Transición Ecolóxica por medio do Programa Pleamar, cofinanciado polo Fondo Europeo Marítimo e de Pesca (FEMP). Ademais, enmárcase no proxecto LIFE IP INTEMARES “Xestión integrada, innovadora e participativa da Rede Natura 2000 no medio mariño español”, que coordina o Ministerio, a través da Fundación Biodiversidade”.
