As enfermidades cardiovasculares son a principal causa de morte no mundo. Grazas ás tecnoloxías de imaxe, a medicina determinou que a acumulación de depósitos de graxa localizados ao redor do miocardio, que se coñecen como tecido adiposo epicárdico, adoita estar máis relacionada cos trastornos cardiovasculares que, por exemplo, o índice de masa corporal. A acumulación desta graxa epicárdica ao redor do miocardio e as arterias coronarias facilita a inflamación e o aumento do tecido, unha circunstancia que aumenta as posibilidades de que o paciente sufra arritmias.
O tecido adiposo epicárdico é, por tanto, un factor de risco tanto para o desenvolvemento como para a progresión dunha enfermidade cardiovascular. Por iso, a investigadora predoutoral do Instituto de Investigación Sanitaria de Santiago de Compostela (IDIS), Rumeysa Basdas, xunto aos seus directores, Sonia Eiras, líder do grupo de Cardioloxía Traslacional e José Ramón González Juanatey, líder do grupo de Cardioloxía, decidiron investigar os efectos preventivos que podería ter do uso da semaglutida —un fármaco antidiabético que se comercializa baixo o nome de Ozempic, Rybelsus, Wegovy ou Dutide, entre outros—en pacientes con patoloxías cardiovasculares.
Tras unha investigación na que incluíron 67 biopsias de graxa epicárdica e subcutánea de pacientes sometidos a cirurxía cardíaca, os investigadores do IDIS determinaron no seu estudo, publicado recentemente na revista americana Journals of the American College of Cardiology (JACC), que o uso de semaglutida, cuxas propiedades melloran a sensibilidade á insulina e reducen a cantidade de tecido adiposo epicárdico, podería ser unha estratexia terapéutica preventiva en pacientes con patoloxía cardiovascular.
Refererencia: Semaglutide Modulates Proinflammatory Epicardial Adipogenesis With Paracrine Effects on hiPSC-Atrial Cardiomyocytes (Publicado en JACC)
