Novo biomarcador para detectar alzhéimer antes de que aparezan os síntomas

Un estudo facilita o diagnóstico temperán da enfermidade en mostras de sangue, e favorece o seu tratamento precoz

Unha nova investigación, liderada polo grupo de Neurobiotecnoloxía Molecular e Celular do Instituto de Bioenxeñaría de Cataluña (IBEC) e da Universidade de Barcelona (UB), describe un novo biomarcador de alzhéimer en estadios asintomáticos da enfermidade. Trátase da molécula miR-519a-3p, un microARN que está directamente relacionado coa expresión da proteína priónica celular (PrPC), que se atopa desregulada en persoas que sofren algunhas patoloxías neurodexenerativas como esta.

A procura de biomarcadores que sexan estables e facilmente detectables en biofluídos, como os microARN, brinda esperanzas para a detección temperá do alzhéimer nas súas etapas asintomáticas iniciais, o que podería axudar no diagnóstico e tratamento precoz desta enfermidade que afecta a máis de 35 millóns de persoas en todo o mundo.

Publicidade

A expresión dalgúns microARN está desregulada en pacientes con alzhéimer. Con todo, é a primeira vez que este microARN se relaciona especificamente coa diminución na produción da proteína priónica celular durante a súa progresión. “Actualmente, as probas para diagnosticar a enfermidade de alzhéimer adóitanse levar a cabo despois da aparición dos primeiros síntomas, cando xa hai unha deterioración cognitiva subxacente”, explica José Antonio del Río, investigador principal do IBEC, catedrático da UB e colíder do estudo.

“Cremos que a detección deste microARN pode establecer criterios adicionais para un diagnóstico máis preciso nas fases iniciais da enfermidade”, engade. Ademais, o traballo analiza de forma comparativa a presenza do biomarcador en mostras doutras enfermidades neurodexenerativas.

“Se o noso obxectivo é utilizar miR-519a-3p como biomarcador para detectar demencia de tipo alzhéimer en persoas hipoteticamente sas, é clave asegurarse de que os seus niveis non estean alterados noutras enfermidades neurodexenerativas”, afirma, pola súa banda, Rosalina Gavín, investigadora sénior do IBEC, profesora da UB e tamén colíder do estudo. “Na nosa investigación comparamos os niveis deste biomarcador en mostras doutras tauopatías e párkinson, confirmando que os cambios do miR-519a-3p son específicos da enfermidade de alzhéimer”, detalla.

Fotografía ao microscopio óptico dunha sección de cortiza frontal humana postmortem dun paciente con alzhéimer escala ou grao VI de Braak (ou máis avanzado). Aprécianse neuronas con elevado contido de proteína tau. Foto: IBEC

Validar este microRNAs como biomarcador

O seguinte paso na investigación, como indica Dayaneth Jácome, investigadora e primeira autora do traballo “é a validación do miR-519a-3p como biomarcador en mostras de sangue de diferentes cohortes de pacientes, para comezar a empregalo no diagnóstico clínico de alzhéimer en mostras periféricas”. A cantidade de proteína priónica celular cambia durante a progresión desta patoloxía, mostrando niveis máis altos nas primeiras etapas e diminuíndo a medida que avanza a mesma.

Aínda que non se coñece en detalle o mecanismo responsable destes cambios, observouse que certos microARN únense a unha rexión específica do xene PRNP, que controla a expresión de PrPC, diminuíndoa. Por iso, os investigadores seleccionaron dito microARN para o seu estudo.


Referencia: miR-519a-3p, found to regulate cellular prion protein during Alzheimer’s disease pathogenesis, as a biomarker of asymptomatic stages (Publicado en Molecular Basis of Disease)

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Unha técnica permite unha visión sen precedentes do cerebro

Un equipo do MIT automatiza unha tecnoloxía para obter imaxes en 3D de cada hemisferio en pouco máis de catro días