Un equipo liderado por José Luis Mascareñas, científico asociado ao Centro Singular de Investigación en Química Biolóxica e Materiais Moleculares (CiQUS) da Universidade de Santiago de Compostela (USC), está a desenvolver un estudo sobre a identificación de novos compostos que alteran e modulan a respiración mitocondrial das células cancerosas. Isto consegue que diminúan o seu potencial para promover e rexenerar tumores. A investigación, que se está levando a cabo en colaboración co Instituto de Investigacións Biomédicas “Alberto Sols” (IIBM CSIC-UAM), tamén conta coa participación do equipo do investigador Bruno Sainz. Os resultados obtidos ata o momento demostran unha potente actividade antitumoral e os estudos in vivo suxiren unha baixa toxicidade asociada con estes compostos de tipo metálico.
Amais disto, a investigación vén de recibir un impulso económico a través de CaixaResearch Consolitate, un programa de Obra Social “la Caixa”. Unha convocatoria que apoia proxectos innovadores e maduros na área de saúde, e que conta cun sólido plan de valorización. Ademais, esta nova subvención permitirá ao equipo do CiQUS e do CSIC realizar unha serie de estudos adicionais co obxectivo de validar a tecnoloxía en modelos preclínicos de diferentes tumores impulsados polas células nai cancerosas. E, así, poder facilitar o seu acceso ao mercado.
A proposta liderada por Mascareñas é un dos cinco proxectos de investigación biomédica que foron seleccionados na segunda quenda desta convocatoria a nivel nacional. Ademais de recibir un apoio económico de 300.000 euros, todos os proxectos contarán coa axuda de mentores para definir os seus plans de desenvolvemento e comercialización de forma personalizada, e apoio experto en transferencia de tecnoloxía, ferramentas de financiamento ou negociacións.
As células nai cancerosas
Máis en detalle, as células nai cancerosas (CSC) son unha subpoboación de células tumorais responsables principalmente do inicio do tumor, a metástase e a resistencia á terapia. Moitas quimioterapias empregadas para combater o cancro non eliminan as CSC en parte debido á súa alta plasticidade, unha propiedade que utilizan as CSC para adaptarse, resistir o tratamento e continuar propagándose. Non obstante, as CSC dependen da respiración mitocondrial para sobrevivir e evadir as defensas do sistema inmunolóxico, que os investigadores cren que representa un talón de Aquiles metabólico destas células.
Os equipos implicados neste proxecto xa teñen unha ampla experiencia neste campo. O liderado por Sainz xerou importantes avances na área da bioloxía celular e na actualidade está explorando formas de alterar os requisitos metabólicos das CSC. O grupo de Mascareñas xa é un equipo de referencia na área da química biolóxica, incluído o deseño de complexos metálicos a base de rutenio que sexan capaces de actuar de forma selectiva sobre o ADN. Os dous laboratorios forman un equipo multidisciplinar cunha dilatada experiencia cuxa colaboración se remonta a un proxecto IGNICIA da Xunta de Galicia.
Referencias:
- Ruthenation of Non-Stacked Guanines in DNA G-Quadruplex Structures: Mejora de la expresión de c-MYC. (Publicado en Angewandte Chemie).
- Explotación de la fosforilación oxidativa para promover las propiedades madre e inmunoevasivas de las células madre del cáncer de páncreas. (Publicado en Nature Communications).
