O investigador principal do Centro de Investigación en Química Biolóxica e Materiais Moleculares (CiQUS) da Universidade de Santiago de Compostela (USC) Diego Peña acaba de participar en Honour Science & Chemistry, un evento organizado polo Consello Europeo da Industria Química que reuniu a 34 científicos europeos do ámbito da química. Ademais, o evento celebrouse no Hotel Metropole de Bruxelas, onde tamén se celebraron os congresos Solvay. De feito, os participantes na cita recrearon a emblemática foto de 1927, que reuniu aos investigadores máis importantes da época.
No que respecta a Honour Science & Chemistry, o evento reuniu a científicos xa consolidados de referencia mundial —entre eles dous premios Nobel—, así como a líderes da industria química e a estudantes de doutoramento en química de toda Europa. No acto debateron sobre como a disciplina continuará cambiando as nosas vídas no futuro próximo e cales son os retos globais aos que se enfronta como, por exemplo, a sustentabilidade ou a loita contra o cambio climático.
Ademais, Honour Science & Chemistry pretende recuperar o espírito das famosas reunións Solvay de comezos do século XIX para establecer pontes entre os líderes químicos da academia e da industria en Europa. Este obxectivo quedou materializado na reprodución da foto de 1927, unha reunión que xa forma parte da historia da ciencia por xuntar a figuras tan importantes como Marie Curie, Albert Einstein e Erwin Schrödinger, entre outros.
Homenaxe a unha imaxe histórica
