Un equipo da Universidade de Cornell, en Estados Unidos, acaba de publicar un estudo na revista Nature Communications no que abren a porta á primeira píldora anticonceptiva masculina. Segundo un ensaio feito en ratos, un novo fármaco é capaz de xerar infertilidade nestes roedores durante unha hora e os seus efectos desaparecen antes das 24 horas. Este estudo experimental podería apuntar, por tanto, cara a un futuro anticonceptivo masculino “baixo demanda”.
O fármaco potencial, que aínda non se probou en humanos —e aínda faltarían anos para que estivera dispoñible—, únese a un grupo cada vez maior de estudos sobre anticonceptivos masculinos. Porén, na actualidade só hai dúas opcións dispoñibles para os homes: os preservativos e as vasectomías. Segundo o portal de noticias ScienceAlert, os medicamentos que se probaron ata o momento non saíron adiante, entre outros motivos, “pola falta de interese da industria farmacéutica. “Neste momento, toda a carga da anticoncepción recae sobre as mulleres”, di Melanie Balbach, primeira autora do Estudo. E engadiu: “Queremos novas opcións”.
A proteína clave
A adenil ciclasa soluble (sAC) é unha proteína que xoga un papel esencial na adquisición e regulación da capacidade fertilizante dos espermatozoides dos mamíferos. Este estudo describe os efectos de TDI-11861, un inhibidor selectivo da sAC e a súa utilidade como anticonceptivo masculino, administrado oralmente e nunha única dose de forma previa ás relacións sexuais, sen que afecte á exaculación ou ao comportamento sexual, segundo explica a científica do CSIC Luz Candenas —que non participou no estudo— nunhas declaracións recollidas polo Science Media Centre (SMC) España.
“Toda a carga da anticoncepción recae sobre as mulleres. Queremos novas opcións”
MELANIE BALBACH, primeira autora do estudo
A sAC actúa como o “interruptor de acendido” dos espermatozoides. Se se apaga, o esperma xa non pode moverse. A través de diferentes probas, o equipo demostrou que un composto que bloquea esta proteína é capaz de inmobilizar o esperma dos ratos de 30 minutos a unha hora. “O composto tivo un 100% de eficacia na prevención do embarazo nas dúas primeiras horas e caeu ao 91% nas primeiras tres horas”, recolle o estudo. Despois de 24 horas, os espermatozoides dos ratos volveron moverse con normalidade.
Un fármaco en oito anos
A raíz deste estudo, os investigadores esperan desenvolver unha píldora non hormonal que funcione en menos dunha hora e dure de 6 a 12 horas. Esta opción sería moi diferente doutras que tamén se están estudando, como un xel hormonal que se está probando en humanos, pero que adoita tardar semanas e meses en comezar e deixar de funcionar. Ademais, neste estudo non se notificaron efectos secundarios en ratos. Outras investigacións anteriores suxeriron que os homes aos que se lles desconectou permanentemente a sAC si tiñan unha maior taxa de cálculos nos riles. De todas formas, isto non sería o caso dos homes que tomasen esta hipotética píldora, posto que o “apagado” sería só temporal.
O composto tivo un 100% de eficacia na prevención do embarazo nas dúas primeiras horas e caeu ao 91% nas primeiras tres horas
O equipo espera poder realizar os primeiros ensaios en tres anos e cun produto final que poida estar listo en oito. “Realizáronse outros intentos de desenvolver anticonceptivos masculinos, pero polo momento ningún deles pasou á clínica. Aínda que esta investigación se levou a cabo en ratos e hai que facer ensaios clínicos para corroborar a súa eficacia en humanos, abre a porta á primeira píldora anticonceptiva masculina dun só uso, ofrecendo unha interesante alternativa ao uso exclusivo de anticonceptivos orais en mulleres”, conclúe Candenas.
Referencia: On-demand male contraception via acute inhibition of soluble adenylyl cyclase (Publicado en Nature Communications)