Os doutores Andrés Íñiguez Romo, xefe do Servizo de Cardioloxía do Hospital Álvaro Cunqueiro de Vigo, e Víctor Alfonso Jiménez Díaz, director da Unidade de Investigación Cardiovascular, son os autores dun artigo recentemente publicado na revista médica The Lancet. Na investigación describen o emprego dunha nova técnica para o tratamento dunha afección coronaria mediante unha intervención cirúrxica (anxioplastia) que ten como vantaxe non deixar atrás material metálico, tal e como ocorre cando se empregan stents metálicos liberadores de fármacos para o tratamento destas afeccións coronarias que, unha vez cumprido o seu papel, fican aloxados na arteria de maneira permanente.
O artigo publicado por estes investigadores do Grupo Investigación Cardiovascular, do Instituto de Investigación Sanitaria Galicia Sur (IIS Galicia Sur), refire a experiencia dunha recente intervención coronaria percutánea realizada no Hospital Álvaro Cunqueiro a unha paciente de 50 anos de idade e motivada por unha síndrome coronaria aguda, empregando esta nova técnica DCB: un balón coronario que libera o fármaco sirolimus cristalizado en 45 segundos, en lugar empregar stents metálicos liberadores de fármacos, como é habitual.
Para amosar a efectividade do tratamento, os investigadores realizaron unha técnica de imaxe denominada tomografía de coherencia óptica (OTC) para visualizar o efecto do balón dentro da arteria coronaria, podendo conformar a presencia de fármaco na arteria, aspecto demostrado por primeira vez con esta técnica.
Tal e como refiren os autores neste artigo: “As imaxes OCT obtidas despois da anxioplastia mostraron partículas hiperecoicas no endotelio do segmento tratado con DCB nunha variedade de patróns diferentes. En particular, as partículas causaron efectos de sombra como os xerados polos puntais dos stents metálicos liberadores de fármacos”.
Resultados equiparables e menos invasivos
Así mesmo, os autores explican que, tras 28 días, realizouse unha nova anxiografía coronaria obténdose un resultado favorable, mostrando que nalgunhas seccións da arteria a maioría das sombras en formas de puntais e as partículas tiñan desaparecido, mentres que nas outras estaban en proceso de absorción, confirmando a persistencia e o efecto beneficioso do fármaco na arteria ao cabo dun mes.
Con estas evidencias, os doutores Íñiguez Romo e Jiménez Díaz conclúen que: “Os DCB tratan as placas aterioscleróticas con axentes antiproliferativos, de maneira similar aos stents liberadores de fármacos, pero sen deixar estrutura metálica permanente algunha, unha estratexia tamén coñecida como: “Non deixar nada atrás”. “Cremos que este caso mostra como se deposita sirolimus e posteriormente se absorbe dentro do endotelio coronario despois da anxioplastia DCB” apuntan. Ademáis, esta técnica de tratamento é aplicable a moitos pacientes con enfermidade das arterias de corazón, permitindo evitar ou diminuír o número e tamaño de stents metálicos a empregar mediante o tratamento combinado destes stents e DCB, sendo posible avaliar o efecto de ámbolos dous tratamentos mediante OTC.
Referencia: Visualización da arteria intracoronaria de depósitos cristalinos de sirolimus despois de anxioplastia con balón recuberto de fármaco para a síndrome coronaria aguda (Publicado en The Lancet)
Enhorabuena y gracias, como cardiópata con tres stens en las arterias coronarias. Hace dos veranos tuve que ser intervenido porque uno de los stens, de más de diez años, se había “atascado”, supongo que con este nuevo sistema do habría sido necesario instalar otro stens dentro del afectado. Mi agradecimiento.