Un grupo de investigadores do Instituto de Investigación Sanitaria de Santiago de Compostela (IDIS) e do Complexo Hospitalario Universitario de Santiago de Compostela (CHUS) realizou un ensaio clínico con pacientes hospitalizados con insuficiencia respiratoria moderada ou grave provocada pola covid. Os resultados demostran que experimentan melloría aos 11 días se se lles aplican doses altas (20mg/día) de dexametasona, en comparación cos pacientes ás que se lle administran as baixas (6mg/día), recomendadas pola Organización Mundial da Saúde (OMS). O estudo acaba de ser publicado na revista European Respiratory Journal.
Máis en detalle, a dexametasona é un fármaco prescrito para aliviar a inflamación e para tratar certos tipos de cancro, artrite, alerxias severas ou asma. Amais disto, a dexametasona emprégase para tratar a insuficiencia respiratoria causada pola covid en pacientes hospitalizados que require de administración de osíxeno. E malia que a OMS recomenda doses baixas, o estudo realizado no IDIS demostra que as altas son máis efectivas e non se asocian a un maior risco de efectos adversos.
O ensaio clínico
Os participantes no estudo presentaban neumonía moderada ou grave. En total, incluíron 200 pacientes cunha idade media de 64 anos, dos que o 62% foron homes. Os resultados revelaron que o 31,4% dos pacientes que recibiron doses baixas do fármaco sufriron empeoramento clínico durante o seu ingreso, en comparación cos 16,3% que recibiron as doses altas de dexametasona, nos que se observou un importante beneficio con altas doses de dexametadona, moi similares ás utilizadas na Unidade de Coidados Intensivos (UCI). Malia o uso de altas doses de corticoides, as reaccións adversas foron similares nos dous grupos estudados.
