Un estudo preclínico no que participaron investigadores da Universidade de Santiago de Compostela (USC) mostra evidencias de que un péptido identificado no veleno dun polbo australiano pode actuar como inhibidor ou, cando menos, retardar significativamente o crecemento de melanoma mutado por BRAF, segundo recolle o British Journal of Pharmacology, que se fai eco da investigación liderada por María Ikonomopoulou, do Instituto Madrileño de Alimentación (IMDEA-Madrid).
A contribución dos investigadores do grupo Acuigen no marco deste proxecto internacional centrouse no desenvolvemento de ensaios in vivo en individuos de peixe cebra, aos que inxectaron células mutadas por BRAF ás que xa se incorporara este composto do veleno de polbo, segundo explicou a catedrática da área de Xenética da USC, Laura Sánchez Piñón. A investigadora precisou que os resultados acadados nestes ensaios concordan cos obtidos nos estudos clínicos realizados pola doutora Ikonomopoulou e apuntan cara a un gran potencial terapéutico.
Esta nova colaboración do Acuigen con esta investigadora do IMDEA deparou resultados moi prometedores, que poderían servir de base para o futuro desenvolvemento de tratamentos eficaces contra o melanoma mutado por BRAF, un tipo de cancro que representa practicamente a metade dos casos de melanoma e cuxo prognóstico acostuma ser malo. “Estamos a falar de resultados dun estudo preclínico”, lembra Sánchez Piñón, ao tempo que engade que este composto do veleno do polbo apenas xera toxicidade, polo que podería resultar un activo importante na loita contra o cancro.
Os antecedentes
O traballo realizado polos investigadores da sede universitaria luguesa enmárcarse nun estudo preclínico liderado pola doutora Maria Ikonomopoulou, quen, logo de comezar esta liña de investigación cando estaba no QIMR Berghofer, implicou tamén neste proxecto a colaboradores das universidades de Queensland e James Cook, así como ao Instituto de Estudos Avanzados en Alimentación de Madrid, centro ao que está vinculada na actualidade.
A doutora Ikonomopoulou probou as propiedades terapéuticas contra o melanoma mutado por BRAF dunha variedade de compostos velenos previamente indentificados pola Universidade de Queensland e reproducidos sinteticamente. Logo de moitas pescudas e estudos con compostos velenosos derivados de animais mariños, o péptido dun polbo de area habitual do sur de Australia foi que destacou pola súa capacidade de dirixirse de forma segura e eficaz ás células de melanoma mutadas por BRAF en modelos preclínicos.
