Únete á nosa canle de Whatsapp
Ás 8.12 desta mañá (7.12 hora portuguesa), un sismo de magnitude 4.9, con epicentro a 130 quilómetros da costa de Peniche, no centro de Portugal, espertou a numerosas persoas na costa oeste da Península. O Instituto Português do Mar e da Atmosfera e o Instituto Geográfico Nacional recibiron bastantes chamadas avisando do tremor, que se chegou a sentir tamén en moitos puntos da costa oeste e do sur de Galicia. 17 minutos despois, ás 8.29, un segundo tremor produciuse cunha magnitude de 3.
Segundo recollen algúns medios portugueses, como Diário de Notícias, o Centro Sismológico Euro-mediterrânico (CSEM) recolleu preto de 40 avisos, sobre todo no norte de Portugal, en localidades como Vila Nova de Gaia, Figueira da Foz, Porto, Viana do Castelo ou Braga, nos que se afirmaba que as ventás, as camas e algúns obxectos tremeran por mor do sismo. Deste xeito, os organismos oficiais clasificaron a intensidade do tremor no nivel III da escala de Mercalli.
En Galicia, o IGN recibiu avisos de localidades como Aldán, Salceda de Caselas, Salvaterra, Tui, As Neves, Nigrán, Baiona, Ribeira, Barro, Poio, Boiro, Gondomar ou Tomiño, cunha intensidade II.
Enxame sísmico entre Viana do Castelo e Braga
O tremor desta madrugada foi o máis forte sentido nas últimas semanas en Portugal, mais non o único. A mediados de agosto, a localidade de Vila Verde, entre Viana do Castelo e Braga, rexistrou preto de 20 sismos, que chegaron a alcanzar magnitude 3,5. Foi por mor dun enxame sísmico, un fenómeno semellante ao que se produciu en maio na zona de Pontecaldelas, en Pontevedra.
Porén, o terremoto que máis se sentiu en Galicia foi o de Taboada, o pasado 21 de agosto, ás 2.28 da madrugada. O IGN recibiu avisos de toda a xeografía galega. O sismo quedou rexistrado cunha magnitude de 3,5 e unha intensidade III-IV.
