O mercado do Berbés, en Vigo, acolle este mércores 5 a segunda charla do ciclo “Ciencia e Cañas” que aborda, desde unha perspectiva divulgativa, o grande interese científico das Illas Cíes. Nesta ocasión será Luis Navarro, profesor do departamento de Ecoloxía e Evolución das Plantas da Universidade de Vigo, o encargado de falar da flora insular das illas e o impacto da acción humana nestes ecosistemas. A charla comezará ás 20.30 horas.
“A vida nas Illas Cíes está condicionada por interaccións raras e peculiares. É fundamental conservalas para asegurar o funcionamento dos ecosistemas”, explican desde Cíes Patrimonio, a entidade que impulsa a candidatura do arquipélago á lista da Unesco, e que está avalada por unha trintena de científicos de diversos eidos.