O percorrido submariño pola ría con Manuel E. Garci pecha o ciclo ‘Vigo Científico’

O biólogo mariño, gran coñecedor dos fondos desta costa, participa este martes ás 19.30 nos encontros organizados por GCiencia e o Consorcio da Zona Franca

O ciclo de encontros ‘Vigo Científico’, unha serie de entrevistas impulsadas polo Consorcio da Zona Franca de Vigo e GCiencia, péchase este martes 27 de abril ás 19.30 horas cunha conversa con Manuel E. García Blanco, Garci, biólogo e divulgador, desde hai máis de 30 anos, dos fondos mariños da ría de Vigo. O encontro será presentado por David Regades, delegado do Estado na Zona Franca, e poderá seguirse a través de gciencia.gal e as súas canles de Facebook, Twitter e Youtube.

Manuel E. García Blanco, coñecido como Garci, naceu en Vigo en 1962. Desde moi novo apaixonouse polo mar, xa que medrou moi preto del. É licenciado en Ciencias Biolóxicas pola Universidade de Santiago de Compostela, e especializouse en Zooloxía Mariña. Traballou como investigador para institucións como a Universidade de Vigo, o Instituto de Investigacións Mariñas do CSIC e o Centro Oceanográfico de Vigo e publicou decenas de artigos científicos, comunicacións e presentacións en congresos, simposios e xornadas de investigación.

Publicidade

Porén, é tamén moi salientable o seu traballo de divulgación do mundo mariño. Ofrece habitualmente charlas en centros educativos e para o público xeral. No eido audiovisual, participou en proxectos documentais como A Ciencia do Mexillón, Ecofisioloxia e Cultivo, Anisakis: el infecto Poseidón, La vida secreta del pulpo, Augas vivas de Galicia, ou A vida no río Minho. Outros dos seus traballos recibiron importantes galardóns cinematográficos, como os documentais Mareas Rojas, O choco: baixo as ondas da enseada de San Simón ou El mar del fin del mundo: el reino de los cefalópodos premiados no Ciclo Internacional de Cine Submarino de Donostia-San Sebastián; Os mares doces de Galicia, gañador do premio Prisma Casa das Ciencias da Coruña, o certame Cortos por Naturaleza, ou o Festival Internacional de Imagen Submarina del Oceanographic de Valencia; ou Curricán, premio á mellor curtametraxe do Festival de Cans. Colaborou tamén con diversos medios de comunicación, empresas e Administracións Públicas na realización de documentais e programas televisivos.

Desde o mes de marzo, ‘Vigo Científico’ reuniu a algúns dos principais referentes científicos da cidade, coas entrevistas a África González, Fernando Aguado ou Begoña Vila.

Publicidade

África González: “Estamos probando vacinas terapéuticas contra o cancro”

Fernando Aguado: “Un satélite de menos de 100kg pode facer fotos de resolución métrica”

Begoña Vila: “Queremos mirar os primeiros obxectos que se formaron despois do Big Bang”

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

O avogado ourensán que descubriu 69 especies na ría de Vigo

A ampla colección de animais mariños de Marcos Fernández Iglesias forma parte do CSIC de Barcelona, despois do seu falecemento en 2022

GCiencia abre o ciclo de faladoiros "Os mundos científicos de Vigo"

Os relatorios darán comezo o luns no edificio Redeiras cunha charla introdutoria que leva por título 'A divulgación científica en Galicia'

A UVigo reivindica no Día Mundial da Auga a importancia do seu acceso universal

A universidade impulsa a concienciación través dunha serie de pódcast con nenos e nenas e dun concurso escolar de microrrelatos
00:03:09

As patacas teñen lingua propia: o vídeo dunha galega finalista nun certame de divulgación

A investigadora da Misión Biolóxica de Galicia Lucía Martín Cacheda presenta unha peza audiovidual sobre a comunicación química das plantas