Sábado 20 Xullo 2024

O catedrático de Computación Senén Barro entra na Academia de Ciencias

A Real Academia Galega de Ciencias (RAGC) celebrou o acto de ingreso de Senén Barro Ameneiro, catedrático no Departamento de Computación e Intelixencia Artificial da Universidade de Santiago de Compostela (USC), que se integra na Sección de Matemáticas e Física do Cosmos. A súa completa a rolda de incorporacións á institución neste ano, no que entraron seis novos académicos de diversas áreas de coñecemento. O discurso de ingreso do novo académico da RAGC titulouse “Poden pensar as máquinas?”. Logo de pronuncialo, recibiu a medalla de mans do presidente da RAGC, Miguel Ángel Ríos, e o diploma polo reitor da USC, Juan Viaño.
Ao acto asistiron o presidente da Deputación da Coruña, Valentín González; o alcalde de Santiago, Martiño Noriega; o presidente do Consello da Cultura Galega, Ramón Villares; e a valedora do Pobo, Milagros Otero.
Senén Barro é catedrático da área de Ciencia da Computación e Intelixencia Artificial desde 1995. Foi director do Departamento de Electrónica e Computación da USC desde 1993 até xuño de 2002 e reitor entre 2002 e 2010, etapa na que promoveu a internacionalización e a aposta emprendedora da USC, conseguíndose o recoñecemento de Campus de Excelencia Internacional para o proxecto do Campus Vida na primeira convocatoria deste tipo en España, celebrada en 2009. Desde maio de 2008 é presidente de RedEmprendia, a Rede Universitaria Iberoamericana de Incubación de Empresas, que conta con 20 universidades iberoamericanas asociadas, ademais do portal Universia e o Banco Santander.

Barro fundou un dos primeiros grupos de Intelixencia Artificial de España

Fundou e dirixe o Grupo de Sistemas Intelixentes, que conta na actualidade con 40 membros e, de acordo co seu nivel de publicacións científicas, é o primeiro grupo de Intelixencia Artificial de Galicia e un dos primeiros de España. É investigador colaborador e investigador responsable de numerosos proxectos e contratos de investigación internacionais, nacionais e autonómicos. Realizou estancias de investigación no Departamento de Informática Médica do Royal Free Hospital en Londres (Reino Unido); no Departamento de Enxeñaría Eléctrica da Universidade de Maryland (Estados Unidos); nos Departamentos de Enxeñaría e Ciencias da Computación das Universidades de South Florida e California; e no Departamento de Enxeñaría Matemática da Universidade de Bristol (Reino Unido).
Presidiu o grupo de TIC da Conferencia de Reitores de Universidades de España (CRUE) desde xuño de 2003 até outubro de 2005. Incorporouse ao Comité Permanente da CRUE en maio de 2005 e en maio de 2008 foi nomeado vicepresidente da entidade, cargo que ostentou até xuño de 2010.

Publicidade

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Unha análise de sangue prognostica o párkinson sete anos antes dos seus síntomas

Un test que utiliza intelixencia artificial permite diagnosticar precozmente a enfermidade neurodexenerativa

Nace ‘Carballo’, o primeiro modelo lingüístico de intelixencia artificial en galego

O novo sistema da USC permitirá a creación de novas ferramentas e aplicacións de IA xerativa ao abeiro do proxecto Nós

Conservar a biodiversidade a través da IA: así o consegue un novo modelo creado en Lugo

A empresa 3edata cartografa hábitats en espazos protexidos mediante técnicas de aprendizaxe automática

Un equipo da Coruña ensaia unha ferramenta de IA para apoiar o profesorado

A iniciativa ProgTutor levouse a cabo con 40 estudantes de bacharelato do IES Sofía Casanova de Ferrol