Na mañá deste luns fíxose público o nome dos gañadores do Nobel de Medicina e Fisioloxía, o primeiro dos prestixiosos galardóns, que se irán anunciando durante esta semana. Os científicos estadoundenses Gregg L. Semenza e William G. Kaelin Jr., e o británico Sir Peter J. Ratcliffe compartirán o Nobel de Medicina “polos seus descubrimentos de como as células senten e se adaptan á dispoñibilidade de osíxeno”, segundo anunciou o xurado.
BREAKING NEWS:
The 2019 #NobelPrize in Physiology or Medicine has been awarded jointly to William G. Kaelin Jr, Sir Peter J. Ratcliffe and Gregg L. Semenza “for their discoveries of how cells sense and adapt to oxygen availability.” pic.twitter.com/6m2LJclOoL— The Nobel Prize (@NobelPrize) October 7, 2019
O traballo de Kaelin, Ratcliffe e Semenza xirou arredor da identificación dos mecanismos moleculares que regulan a actividade dos xenes en resposta a variacións nos niveis de osíxeno. Este é un aspecto clave para os animais, xa que precisan do osíxeno para converter os alimentos en enerxía útil.
Cos seus achados, os gañadores do Nobel de Medicina 2019 revelaron o mecanismo dun dos procesos adaptaticos máis esenciais da vida. Estableceron as bases para comprender como os niveis de osíxeno afectan ao metabolismo celular e á función fisiolóxica.
Alén disto, os avances dos seus traballos abriron o camiño para novas e prometedores estratexias contra doenzas como a anemia, o cancro e moitas outras.
Os tres gañadores do Nobel de Medicina desenvolven o seu traballo en institucións dos seus paises de orixe; William G. Kaelin Jr (Nova York, 1957) é investigador do Instituto Médico Howard Hughes e catedrático da Escola Médica de Harvard. Gregg L. Semenza (Nova York, 1956), é director do Programa de Investigación Vascular no Instituto Johns Hopkins (universidade na que tamén é catedrático) para a Enxeñaría Celular. Pola súa parte, Peter Ratcliffe (Lancashire, 1954), é director de Investigación Clínica no Instituto Francis Crick de Londres e catedrático da Universidade de Oxford.
O ano pasado, o Nobel de Medicina recaeu en James P. Allison (Estados Unidos) e Tasuku Honjo (Xapón) polos seus achados na investigación da inmunoterapia contra o cancro.
Máis información (en inglés) na páxina dos Premios Nobel.
