May-Britt Moser (Fosnavåg, 1963), a científica norueguesa que acadou en 2014 o Nobel de Medicina polos seus achados sobre as células que compoñen o sistema de posicionamento no cerebro humano, visitará Galicia o vindeiro 27 de setembro. A investigadora participará nunha xornada de actividades organizada pola Fundación AstraZeneca e Nobel Prize Inspiration Initiative -entidade que difunde no ámbito mundial os logros e as experiencias dos Premio Nobel-, en colaboración co programa ConCiencia.
A visita de Moser a Galicia “enmárcase – segundo informa a USC – nun programa educativo global que ten como obxectivo inspirar aos novos investigadores a través de referentes científicos galardoados co Nobel”. Despois de 25 edicións, a iniciativa ten lugar por primeira vez en Galicia.
May-Britt foi galardoada polos seus achados no posicionamento do cerebro xunto ao seu home Edvard e John O’Keefe
Deste xeito, 27 estudantes e investigadores da USC poderán conversar con Moser o día 27. Con eles compartirá a súa experiencia profesional, que a levou ata o Nobel, e fomentará con eles a creatividade nas investigacións.
A axenda de Moser comezará ás 10 da mañá na Facultade de Medicina coa conferencia ‘ Espazo, tempo e memoria no cerebro’, para o que é necesaria a confirmación de asistencia nesta ligazón. Logo de diversas reunións institucionais co reitor e líderes de grupos de investigación da universidade compostelá, Mary-Britt Moser manterá ás 15.30 horas un encontro con persoal investigador do Centro de Investigación en Medicina Molecular e Enfermedades Crónicas da USC (CiMUS).
Moser, graduada en Psicoloxía pola universidade de Oslo e doctora en neurofisioloxía, acadou o Nobel en 2014 xunto a John O’Keefe e o seu propio marido Edvard. O matrimonio Moser, o 5º na historia que acadou un Nobel de forma conxunta, descubriu en 2005 un tipo de célula clave para a orientación preto do hipocampo, un área situada no centro do cerebro. Actualmente, May-Brit dirixe o Center for Neural Computation de Trondheim.
