A XLI edición dos Premios da Crítica de Galicia entregou o pasado sábado os seus galardóns en Vigo. A iniciativa, que desde 1978 recoñece a excelencia e a relevancia dos traballos individuais e colectivos na creación cultural e científica en Galicia, entregou na súa modalidade de Investigación o recoñecemento a José Luis Mascareñas, director do CiQUS de Santiago e un dos científicos de referencia en Galicia no eido da Química.
O xurado subliñou que Mascareñas “ten unha exitosa traxectoria investigadora no ámbito da Química, que se aplica a outras áreas de coñecemento como a Bioloxía e a Biomedicina. Destaca tamén que é o único investigador en Galicia que, traballando dende o país, conseguiu un Advanced Grant do ERC, o que supón a atracción de fondos europeos para fomentar a investigación en Galicia”.
O ditame decidiuse por consenso por parte do xurado formado por Clara V. Álvarez, profesora de Fisioloxía na Facultade de Medicina da USC e directora do Grupo de Investigación sobre Neoplasias e Diferenciación Endocrina no CIMUS; Ángel Manuel Sánchez Bermúdez, catedrático de Enxeñería Química da UVigo; Felipe Criado-Boado, profesor de investigación do CSIC e director do Instituto de Ciencias do Patrimonio (INCIPIT); Nieves Lagares, profesora da Facultade de Ciencias Políticas e Sociais da USC; Rubén Lois González, catedrático da facultade de Xeografía e Historia da USC e vicepresidente da Unión Xeográfica Internacional; Victoria Otero Espinar, matemática e Vicerreitora de Titulacións da USC e Malores Villanueva, secretaría, en representación da APCG.
Mascareñas sucede no galardón a Marcos Pérez Pena, doutor en Comunicación e xornalista de Praza Pública, polo seu traballo A prensa en Galicia na Transición de Marcos Pérez Pena. No eido de Iniciativas Culturais e Científicas, no que foi premiada a xornalista Ana Romaní, o portal GCiencia estivo entre os finalistas. Nesta modalidade foi premiado o ano pasado o Programa Conciencia, que dirixe o catedrático da USC Jorge Mira.
