Jose Edelstein: “Stephen Hawking foi un exemplo de tenacidade, teimosía, loita e xenio”

Os números, ademais de axudar a comprender todo o que somos e o que temos arredor de nós, achegan ás veces coincidencias que semellan ser máis ca casualidades. Mentres falaba con GCiencia, despois de varias horas “atendendo á miña tristeza e ás chamadas dos medios”, Jose Edelstein (Buenos Aires, 1968), profesor de Física da Universidade de Santiago, non podía deixar de lembrar as casualidades coas datas do nacemento e a morte de Stephen Hawking: “Naceu o día que se cumprían 300 anos da morte de Galileo, e morreu o día do nacemento de Einstein, coa mesma idade que tiña el cando morreu”.

Edelstein mantivo unha relación habitual con Hawking e o seu entorno, sobre todo, desde a visita do científico a Galicia no 2008. No 2008, o Programa Conciencia, que dirixe Jorge Mira, comezou a entregar o premio Fonseca a figuras mundiais da investigación, e naquela primeira edición foi premiado Hawking. O primeiro contacto, con todo, foi case vinte anos antes.

Publicidade

Edelstein visitou varias veces a Hawking en Cambridge e entrevistouno en 2013

“Estaba estudando Física en Bariloche e había unha colección de biografías de físicos que me gustaba moito. Lin a de Hawking, e caín na conta de que era case o único que estaba vivo”, lembra Edelstein. Oito anos despois, viuno por primeira vez en persoa. “Estaba a punto de mudarme a Galicia, e veu a Chile a dar unha conferencia. E claro, viaxei ata alí para velo”.

O premio Fonseca achegou a Hawking a Galicia. A escultura que lle entregou a Universidade de Santiago estaba na mesa do seu despacho, e tal e como lembra Jose Edelstein, o físico recomendaba a capital do país ao seu entorno. “Cando un dos seus asistentes ía casar, pediulle a Hawking, xa que el viaxaba tanto, que lle recomendase un lugar para pasar a lúa de mel. E Hawking recomendoulle Santiago de Compostela”.

Publicidade

Edelstein tivo oportunidade de velo varias veces máis. En 2012, xunto a Jorge Mira, participou na festa do seu 70º aniversario, á que Hawking non puido acudir por problemas de saúde. E en 2013, entrevistouno para El País Semanal. “Era unha das primeiras entrevistas que facía, e téñolle moito cariño a aquela experiencia. Foi algo moi intenso, compartir aquel tempo con el, ver como se desenvolvía dentro da súa situación… Algo inesquecible”.

A última vez que viu en persoa a Hawking foi hai apenas dous anos no Festival Starmus celebrado nas Illas Canarias. E aquela viaxe tamén foi a última vez na que o físico estivo en Galicia. “Os médicos desaconsellaron que viaxara en avión, así que foi nun cruceiro, e fixo unha parada aquí”, lembra Edelstein.

O legado de Hawking, segundo Edelstein

Alén da relación persoal e profesional, o profesor da USC destaca a relevancia científica, pero tamén social, da figura de Stephen Hawking. “Que un científico de tantos quilates poida facer un libro como Breve historia do tempo, cunha linguaxe comprensible para todo o mundo, e que vendera millóns de exemplares, é algo moi difícil de conseguir”.

Sinala Edelstein que a personaxe pública de Hawking, marcada desde a súa xuventude pola esclerose lateral amiotrófica que padecía, tamén contribuíu a facer visible a loita das persoas que padecían ELA. “Era o paradoxo dun corpo case inservible, totalmente inmovilizado, e un cerebro en perfectas condicións, capaz de explicar a orixe do universo e converterse nunha figura de importancia mundial”. “Foi un exemplo de tenacidade, teimosía, loita e xenio”, conclúe. “Un científico enorme, en asuntos que son básicos para comprender a nosa orixe, e ao mesmo tempo, unha gran divulgador”.

Edelstein apunta que cando algunhas das predicións de Hawking poidan ser por fin constatadas, a relevancia histórica do seu legado será aínda maior. “Non sei canto se vai tardar en comprobar as súas achegas sobre os buracos negros ou a formación e a estrutura das galaxias, pero estou seguro de que vai ser recordado durante moito tempo”, conclúe.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Presión social e redes: as claves do éxito do cánnabis entre os mozos segundo un estudo galego

Un traballo da USC sinala que a baixa percepción de risco entre os mozos incentiva o consumo da droga máis popular tras tabaco e alcol

Antes de Humboldt e Darwin estivo José de Acosta

As obras do xesuíta do século XVI influiron a pensadores revolucionaros e iniciaron o que hoxe se coñece como a ciencia dos sistemas da Terra

As computadoras saben ler poesía: un estudo pioneiro analiza a obra de José Ángel Valente

Un profesor e unha investigadora da USC estudan o rico e intrépido universo dunha das figuras fundamentais da poesía española contemporánea

A UDC detecta a presenza dunha alga invasora nas rías da Coruña e Vigo

O persoal investigador de BioCost e BioAplic identificou en Galicia á 'Rugulopteryx okamurae', unha especie que xa está a causar problemas no sur da península