O premio Nobel de Medicina Torsten Wiesel visitará A Coruña o vindeiro xoves, 2 de febreiro, para impartir unha conferencia organizada polo Coruña Biomedical Institute Foundation (CorBI Foundation), dentro da programación denominada CorBI Torsten Wiesel Lectures. A conferencia terá lugar o propio 2 de febreiro, ás 19.30h, no salón de actos do Muncyt.
Torsten Wiesel, Nobel de Medicina, ex secretario xeral do Human Frontier Science Program e presidente emérito de The Rockefeller University, acompañará ao director do laboratorio de Neurobioloxía da devandita universidade, Charles Gilbert, que impartirá a primeira das CorBI Torsten Wiesel Lectures. Gilbert estuda os circuítos do cerebro e como as interaccións entre grupos de neuronas contribúen á percepción visual, aprendizaxe e memoria.
O sueco Torsten Nils Wiesel (Upsala, Suecia, 1924) gañou o Premio Nobel de Medicina en 1981. Wiesel estudou Medicina no Instituto Karolinska de Estocolmo, graduándose en 1954. Iniciou a súa carreira docente nese mesmo instituto, para posteriormente trasladarse aos Estados Unidos onde impartiu cátedras de Fisioloxía en Harvard e na Universidade Johns Hopkins. En 1983 trasladouse á Universidade Rockefeller de Nova York sendo presidente desta universidade desde 1992. Wiesel foi distinguido co Nobel polas súas achegas no estudo da área visual da cortiza cerebral. Compartiu esta honra co canadense David Hubter Hubel e o estadounidense Roger Wolcott Sperry.
