“O humor é unha boa ferramenta para transmitir ciencia”. Así o cre a bióloga coruñesa Alba Aguión, que xa está na final do Famelab, o concurso internacional de monólogos científicos que organiza a Fundación Española de Ciencia e Tecnoloxía (FECYT).
Por primeira vez, Galicia está representada na final deste certame, que ten un gran tirón. Na semifinal de Barcelona, houbo máis de 700 persoas. E os seus mellores monólogos rematarán no programa divulgativo ‘Órbita Laika‘, da 2 de TVE.
A peza de Alba Aguión titúlase ‘En defensa das chicharras’ e é unha divertida réplica á fábula grega de ‘A Chicharra e a Formiga‘, desde unha perspectiva zoolóxica.
Alba Aguión é licenciada en Bioloxía pola Universidade de Santiago, con dobre especialidade en Zooloxía e Bioloxía Mariña. Desde Setembro 2014 reside no Reino Unido, onde cursou un máster en Ecoloxía na cidade de York. Actualmente traballa para a compañía Education Through Expeditions (ETE) con sede en Plymouth. E o seu traballo consiste en visitar centros educativos en UK realizando talleres sobre o Àrtico e a ciencia polar, usando a súa experiencia como científica en Svalbard “para inspirar a estudantes e a xente nova, e tentar abrirlles a mente xa desde pequenos a ambicións e soños que quizá nunca pensarían. Para min a verdade só hai unha cousa mellor que facer o que che gusta, e é compartila”. Alba ten colaborado con artigos en GCiencia a través do grupo Ecoloxía Azul.
De formigas sabe dabondo Alba Aguión, porque na Universidade de York participou nun estudo científico sobre pesticidas contra a formiga invasora de xardín. Antes estudara os gases nos glaciares árticos e participou nunha campaña oceanográfica co IEO e o CSIC en Vigo.
– Tiña experiencia previa no escenario, por exemplo no teatro afeccionado?
-Non, non fago teatro. Creo que o meu traballo organizando obradoiros e dando charlas en coles sobre as Rexións Polares é o que me axudou a desenvolver a miña habilidade de falar en público. O demais foi practicar, practicar e practicar o meu monólogo ata aburrirme.
– Necesita a ciencia ser menos grave e achegar sentido do humor?
-Si, dende logo. Eu vexo o humor como unha boa ferramenta para transmitir ciencia. Encántame compartir o que sei de Bioloxía e sempre tentei complementar a obxectividade e a exactitude da ciencia con ferramentas como o humor, as metáforas ou as comparacións que me permitan crear pontes para chegar a un público non especializado. Creo que é importante saber transmitir emocións á hora de tentar que a ciencia prenda na nosa sociedade, aínda que no laboratorio haxa que usar cifras e datos exactos.
-Que espera da final?
-O meu obxectivo para a final é que a xente se emocione e se apaixone coas formigas. É un gran reto xa que teño só 3 minutos e a desvantaxe de que a xente ve as formigas como algo insignificante ou molesto. Pero non sería xusto para a fábula grega de Esopo non mencionar a súa outra parte.
A final espera a Alba Aguión o próximo 12 de maio en Madrid, cun novo monólogo. O gañador de Famelab representará a España no Cheltenham Science Festival que se celebrará en xuño no Reino Unido.
