A Unidade de Fibrose Quística do hospital de Vigo, distinguida pola súa excelencia

​A Unidade mixta de Fibrose Quística -de adultos e pediatría- do Hospital Álvaro Cunqueiro de Vigo, vén de ser acreditada coa certificación de calidade e coa calificación de excelente, pola Sociedade Española de Fibrose Quística.

Trátase da primeira e única Unidade de Galicia en recibir esta certificación nacional. Para a responsable desta Unidade, a neumóloga Cristina Ramos, a obtención desta acreditación “recoñece que se presta unha atención coas maiores garantías e supón unha validación dos protocolos e do traballo en equipo e colaborativo realizado con outros servizos hospitalarios, e en coordinación coa Asociación galega de pacientes de fibroses quística”.

Publicidade

Trátase dunha unidade multidisciplinar, coordinada pola doutora Ramos e a pediatra María Jesús Rodriguez, na que tamén participan especialistas en endocrinoloxía, dixestivo, rehabilitación, xunto con fisioterapeutas e traballadores sociais. Nesta altura, a unidade ten en seguemento a 55 pacientes (28 adultos e 23 menores).

Tratamentos innovadores 

A fibrose quística é unha enfermidade crónica e hereditaria que representa un grave problema de saúde. É unha enfermidade dexenerativa que afecta principalmente aos sistemas respiratorio e dixestivo. Consiste nunha alteración xenética que impacta nas zonas do corpo que producen secreccións, dando lugar a un espesamento e diminución do contido de auga, sodio e cloro, orixinándose a obstrución das canles que transportan esas secrecións e producindo infeccións e inflamacións que destrúen partes do pulmón, fígado, páncreas e sistema reprodutor principalmente. É unha patoloxía grave de tipo evolutivo que condiciona a saúde e unha esperanza de vida limitada.

Estímase que a incidencia da fibrose quística no noso país é de 1 por cada 5.000, aínda que a prevaleza da alteración xenética que produce a enfermidade é moi alta, xa que un de cada 35 habitantes do noso país son portadores dalgunha das case 2.000 mutacións coñecidas que poden condicionar esta enfermidade.

Nos últimos anos avanzouse moito no coñecemento e tratamento da enfermidade; pero, a pesar diso, segue sendo unha patoloxía sen curación. Cando a enfermidade se nun estadio moi avanzado, existe a posibilidade do transplante pulmonar e/ou hepático.

Segundo explica a doutora Ramos “hoxe en día existen terapias farmacolóxicas moi innovadoras, que requiren dun seguemento moi específico dos doentes, polo que é moi importante que esa atención sexa prestada por unha unidade acreditada”.