As poboacións humanas foron espallándose polo mundo a partir do que foi o seu berce, África. E de aí, foron percorrendo todo o planeta. Agora, un estudo xenético logrou descubrir quen son os que, polo menos ata os estudos actuais, máis tiveron que migrar ata asentar. Trátase dos nativos da zona da Patagonia, en América do Sur.
O estudo, publicado en Science, secuenciou o xenoma de 1.537 persoas de 139 grupos étnicos de diversas rexións. Os indíxenas da zona terían percorrido gran parte do mundo, desde África ata o leste de Asia, polo norte, para cruzar a América, ata chegar ao sur. Isto, co paso de moitas xeracións.
Este traballo parte da base de intentar secuenciar xenomas de diversos grupos, especialmente daqueles máis ignorados ao longo da historia. O obxectivo era analizar as poboacións e reconstruír migracións prehistóricas para ver como afectou a diversidade da humanidade.
Algúns dos resultados amosan que os nativos de América do Sur teñen ascendencia común cos grupos de Siberia Occidental, algo que se pode identificar pola gran proximidade xenética que teñen. Porén, non se puido identificar un grupo concreto que puidese ser o ancestral directo. Estas poboacións cruzaron pola ponte terrestre de Berinxia, unha zona que hai miles de anos unía América e Asia e no que actualmente está o Estreito de Bering.
A partir desa migración, dividíronse en varios pobos: amazónicos, andinos, patagónicos… Entre estes, teñen moitos segmentos de ADN iguais, o que indica que un pequeno grupo na zona foi o que deu orixe a toda a poboación. Estas liñaxes foron separándose entre 13.900 e 10.000 anos atrás.
O illamento xeográfico, clave
Estes migrantes acabaron en lugares con importantes barreiras xeográficas que dificultaron que puidese ter unha maior diversidade xenética. Desde aquí, os grupos foron sufrindo grandes declives demográficos ata a actualidade. En gran parte, pola chegada dos europeos, con todo o que supuxo: a colonización, a violencia constante e a chegada de novas enfermidades. En parte, pola menor diversidade dun tipo de xenes que axudan na inmunización, os HLA, algo potenciado polo illamento xeográfico que viviron.
Os investigadores tamén acharon outras conclusións. Entre estas, por exemplo, atoparon un xene na poboación dos Andes que permite adaptarse mellor aos baixos niveis de osíxeno. Todo isto foi no marco do proxecto GenomeAsia100K que buscan cartografar a diversidade xenética de Asia. Ademais, contou coa participación dun total de 48 autores e 22 institucións de Asia, Europa e América.
