No Centro de Negocios que a Zona Franca ten no Parque Empresarial Porto do Molle en Nigrán, enxeñeiros, biólogos e expertos en automoción, entre outros profesionais, teñen a oportunidade de converter as súas ideas de negocio en empresas de futuro.
A aceleradora ViaGalicia, que ten alí as súas oficinas, recibe en cada edición, e xa van sete, centos de proxectos que analiza polo miúdo. De feito, o obxectivo desta iniciativa creada en 2013 é impulsar, diversificar e modernizar o tecido industrial galego e para iso todas as propostas, de calquera sector, e sen importar a fase de desenvolvemento na que se encontren, son benvidas.
En ViaGalicia expoñen a súa experiencia tres emprendedores que participaron ou participan na actualidade no programa. Unha visita a Porto do Molle permite coñecer de implantes á medida para animais, de millóns de pezas de automóbiles que encontran en liña unha segunda vida e de proteínas alternativas que axudarán a loitar, de maneira sostible, contra a escaseza de alimentos no mundo.
