Abrirse paso no mercado internacional máis rápido e con menos risco, é a proposta da aceleradora ViaExterior do Consorcio Zona Franca de Vigo, ás empresas de calquera sector que queiran expandir o seu campo de negocio ou consolidar a súa presenza noutros países.
Esta aceleradora que naceu no ano 2017 e que xa leva convocadas cinco edicións, ofrece acompañamento personalizado e un diálogo constante cos seleccionados cada ano, incluso despois dos oito meses que dura o programa de formación e asesoramento.
Algunhas empresas que participan en ViaExterior teñen xa unha grande presenza nos mercados doutros países, outras tiveron breves experiencias no exterior e outras nunca tiñan incluído na súa estratexia a internacionalización, polo complexo, longo e custoso que pode resultar o proceso.
Ana Andrés, xerente en Vigo dunha empresa de fornecemento industrial e asesoría de proxectos de aloxamento turístico, Carlos Alonso, director de comercio exterior nun referente mundial da transformación de granito e pedras exóticas no Porriño, e Senén Rodríguez, que se prepara para tomar as rendas do negocio familiar de mobles de cociña en Ponteareas, cóntannos a súa experiencia na aceleradora nesta videoreportaxe.
