O sistema dunar da praia de Melide inclúe o areal máis fermoso da illa de Ons. O seu bo estado de conservación permite apreciar a flora característica dun dos hábitats máis representativos do Parque Nacional.
As súas vistas privilexiadas á ría de Pontevedra, a súa area branca e fina e as súas augas de cor azul turquesa fan da praia de Melide un dos mellores areais de Ons. Ademais aquí, a presión dos visitantes é moi escasa, facendo destas dunas un lugar perfecto para gozar da tranquilidade e deleitarse con este sistema xeomofolóxico de incalculable valor.
Para a observación
Este sistema dunar, xunto co de Muxieiro, situado nas illas Cíes, constitúe un dos principais depósitos de area do parque nacional. Cando o vento ou as ondas retiran a area da praia durante os temporais de inverno, ésta é substituída pola acumulación de area das dunas, achegando resiliencia ao ecosistema nos meses máis duros do ano.
Neste sistema dunar atoparemos vexetación típica deste tipo de ecosistemas en movemento. Destaca o cardo mariño (Eryngium maritimum) que, grazas a súa cor verde azulada, pode resistir as altas temperaturas no duro ambiente dunar. Tamén podemos ver a cebola das gaivotas (Pancratium maritimum), cuxas raíces e bulbo poden acumular suficiente auga para resistir nas épocas de sequía.
Outra planta de interese é o feo de praia (Ammophila arenaria subsp. arundinaceae), que pode chegar a medir ata un metro de altura e grazas á lonxitude das súas raíces, que poden superar os cinco metros, é capaz de atopar humidade a grandes profundidades. Esta planta é fundamental para a formación destas dunas, fixando a area coas propias raíces, e dando lugar, deste xeito, á primeira fronte dunar.
Sabías que…?
En Ons podemos atopar poboacións de Linaria arenaria, unha pequena planta, cuxa distribución se restrinxe a uns poucos puntos da costa francesa e a catro illas da costa galega, polo que está considerada en perigo de extinción. Dada a sensibilidade desta especie, cómpre ter especial coidado ao acceder á praia, sendo necesario facelo exclusivamente a través das pasarelas sinalizadas.
O refuxio da píllara das dunas
As dunas de Melide contan cunha especial protección por ser refuxio da píllara das dunas (Charadrius alexandrinus), unha pequena ave limícola, de patas longas e pico fino, que vive en zonas de auga pouco profunda. Nidifica tan só en dunas e praias, directamente sobre a area, polo que é moi sensible ás alteracións destes ambientes. Ante calquera tipo de perturbación, abandona o niño e os ovos quedan sen incubar, por iso é moi importante respectar as limitacións de acceso, indicadas polo parque nacional.
