Perseverance chega a Marte tras superar os sete minutos de terror

O 'rover' pousouse con éxito no cráter Jezero, onde buscará indicios de vida microbiana na zona, con restos dun antigo lago

A “Perseverance” xa está en Marte. Pasou con éxito os xa famosos sete minutos de incerteza, onde todo se fiaba a unha tecnoloxía traballada durante anos para que todo funcione de forma óptima a millóns de quilómetros de distancia. A misión chegou ao planeta vermello algo antes das 22.00, hora peninsular, nunha semana moi relevante para a exploración do planeta vermello despois de que entrasen na súa órbita as misións Al Amal (Emiratos Árabes Unidos) e Tianwen-1 (China). E por primeira vez, puido seguirse a través da canle da NASA en español, que GCiencia retransmitiu tamén a través do seu portal e as súas contas de Facebook e Youtube.

Foi arredor das 21.55 horas cando comezou o momento crítico da misión. Tendo en conta o retardo das comunicacións con Marte (uns 11 minutos), a emisión recolleu as imaxes e os sons que rodean á Perseverance nestes minutos de incerteza. En pouco tempo, a nave reduciu a súa velocidade desde os 20000 km/h ata os 3km/h, para pousarse suavemente sobre a superficie do planeta.

Publicidade

Perseverance buscará posibles restos de vida microbiana no planeta vermello. Para isto está previsto que se pouse no cráter Jezero, preto do ecuador de Marte, onde se cre que hai miles de millóns de anos houbo un lago de auga formado na desembocadura dun río.

Fernando Abilleira e o CSIC

Unha das persoas que supervisará a misión será Fernando Abilleira, un enxeñeiro orixinario de Galicia, que é Director de Deseño de Misión e Navegación e Subdirector de Operacións de Voo de Perseverance e xa participara nas viaxes de Curiosity (2012) e InSight (2018). Nesta entrevista da Axencia SINC publicada en outubro de 2020 explicaba os retos do ambicioso proxecto.

Publicidade

Fernando Abilleira: “As misións a Marte representan a toda a humanidade”

O ‘rover’, que ten o tamaño dun turismo e pesa arredor dunha tonelada, contará con diversos instrumentos deseñados e fabricados por científicos españois e institucións como o CSIC e a Universidade de Valladolid. MEDA, que constitúe a estación meteorolóxica do vehículo, achegará información diaria sobre o clima de Marte. Da súa fabricación encargouse o Centro de Astrobiología (CAB). Pola súa parte, o SuperCAM, que estudará as rochas e o solo do planeta vermello, contou coa participación do Instituto de Geociencias (IGEO), centro mixto do CSIC e a Universidad Complutense de Madrid). SuperCAM

A procura de vida en Marte é un aspecto clave para comprender tamén a xénese da vida na Terra. Ao pousarse nunha zona onde se cre que houbo auga hai miles de millóns de anos, Perseverance recollerá rochas e restos de po e area da superficie para intentar traelas de volta á Terra en futuras misións. Ademais, abordarase a potencialidade de futuras expedicións humanas ao planeta.

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

A NASA anuncia que haberá mais tormentas xeomagnéticas coa chegada do máximo solar

O cambio de ciclo do Sol, producido cada 11 anos, afecta á frecuencia e intensidade dos distintos fenómenos que acontecen na estrela: de que xeito inflúe isto na Terra?

A NASA xa ten resposta para as sorprendentes “arañas” que cobren a superficie de Marte

Investigadores estadounidense recrean nun laboratorio o proceso que dá lugar ás estrañas formas captadas polos satélites no planeta vermello

A visualización da NASA que alerta do quecemento global: “O peor está por chegar”

A axencia espacial estadounidense advirte que a última década foi a máis cálida dende que hai rexistros

Cantos meteoritos impactaron contra a Terra? Descúbreo neste mapa interactivo

A ferramenta da NASA recompila a información recollida polos seus sensores dende 1988 e actualízase periodicamente