“Cousiñas de Muller” é o título do vídeo realizado pola compañía de teatro A Panadaría para a Unidade de Igualdade da Universidade de Vigo, co que se quere conmemorar o Día Mundial da Muller e a Nena na Ciencia. A peza alude ao chamado Efecto Matilda, un prexuízo que perdurou durante séculos na ciencia, e que expón como mulleres científicas moi salientables reciben menos recoñecemento polo seu traballo do que recibía un compañeiro home no examen obxectivo do seu desempeño.
O Efecto Matilda é un concepto acuñado pola historiadora da ciencia Margaret W. Rossiter, que bautizou o fenómeno na honra da sufraxista e pensadora Matilda Joslyn Gage. A peza remítese ás historias de Marie Curie, Olimpia Valencia, Tabitha Babbitt ou Ángela Ruiz, para lembrar como, en moitos casos, a muller desapareceu dos recoñecementos científicos en detrimento de figuras masculinas.
