Ten varios nomes en galego como peixe lúa, orellán ou roda de mar. Así que é un vello coñecido dos mariñeiros, que o teñen atopado aínda que é unha especie máis propia de augas mornas.
O orellán (Mola mola) é unha especie peláxica, ademais de ser o peixe óseo máis pesado do mundo e pode chegar a dúas e medir máis de 3 metros. Habita en augas tropicais e quentes ao longo de todo o planeta.
Na mañá deste domingo, efectivos do Servizo Municipal de Emerxencias de Boiro localizaron un xigantesco exemplar de orellán (Mola mola), que se atopaba en augas interiores, á altura da praia de Barraña e a desembocadura do río Coroño. É dicir, demasiado preto da costa do municipio boirense, polo que corría un serio perigo.
Membros deste servizo conseguiron acompañar ao peixe lúa para que regresase a augas máis fondas. Mentres que a Coordinadora para o Estudo dos Mamíferos Mariños ( Cemma) deu instrucións para axudar ao peixe. Na Cemma consideran que este orellán estaba “a piques de varar” e destacan que “resulta moi pouco habitual observar a esta especie dentro das rías”.
