A terra segue movéndose no oeste de Pontevedra, xusto o día no que se cumpren 21 anos do sismo de magnitude 5,1 en con epicentro no coñecido como triángulo sísmico de Lugo. Nas últimas horas, o Instituto Geográfico Nacional rexistrou dous novos movementos sísmicos nos municipios de Ponte Caldelas e Soutomaior. Foron terremotos de pouca magnitude (1,8 e 2) pero que confirman a continuidade do enxame sísmico que comezou a manifestarse a pasada semana.
Despois da sucesión de terremotos dos días 15 e 16, nos que chegaron a acumularse 32 movementos segundo os sismógrafos do IGN, cunha magnitude máxima de 3,1, a frecuencia destes sismos baixou, pero seguiu habendo actividade. De feito, o maior terremoto, de magnitude 3,2, sentiuse ás 7.30 horas do pasado día 17 en numerosas localidades do sur de Galicia. O IGN recibiu confirmación de que se sentira con intensidade III en puntos como Poio, Marín, Barro, Meis e Pontevedra, e con intensidade II en Dozón, Sanxenxo, Melón, Redondela, Ribeira ou Vilanova de Arousa. Poucas horas antes, ás 3 e ás 5 da madrugada, sentíronse tamén movementos sísmicos de magnitude 2,9 e 2,7.
A pasada semana, despois de que aconteceran os primeiros terremotos na zona, o director da Rede Sísmica do Instituto Geográfico Nacional, Emilio Carreño, confirmaba a GCiencia que esta situación “poderíase clasificar” como enxame sísmico; é dicir, a sucesión de tremores que se producen nun área concreta durante un período determinado de tempo, e que poden durar horas, días ou meses.
Tal e como sinalaba tamén o xeólogo Juan Ramón Vidal Romaní, existe unha pequena falla activa baixo a zona da provincia de Pontevedra onde se están a producir os sismos. O rexistros históricos tamén dan conta da existencia de sucesos semellantes no pasado nesta mesma zona.
