A sonda solar de Parker da NASA vén de facer historia co achegamento máis próximo ao Sol por un obxecto feito polo ser humano. O 29 de outubro de 2018, ás 17:04 horas UTC, superou o récord anterior, que estivo vixente durante décadas, de 42,73 millóns de quilómetros da superficie solar.
“Hai apenas 78 días que se lanzou Parker Solar Probe, e agora achegámonos máis á nosa estrela que calquera outra nave espacial na historia”, dixo o xerente de proxecto Andy Driesman, do Laboratorio de Física Aplicada Johns Hopkins . “É un momento de orgullo para o equipo, aínda que seguimos enfocados no noso primeiro encontro solar”. O récord anterior foi establecido pola colaboración xermano-estadounidense Helios 2 en abril de 1976. Do mesmo xeito que a sonda solar de Parker, Helios 2 foi unha sonda enviada á órbita solar para estudar os procesos no Sol.
Helios 2 tamén estableceu o récord de velocidade en órbita heliocéntrica en 1976, alcanzando unha velocidade máxima de 246,960 quilómetros por hora, tamén en abril.
Espérase que Parker supere o récord de velocidade heliocéntrica de Helios 2 (medido con respecto ao Sol) o 29 de outubro ás 10:54 pm EDT (2:54 UTC, 30 de outubro). Tamén se espera que supere o récord de velocidade xeocéntrica na súa pasada final arredor do Sol, alcanzando os 692,017 km/h, aínda que iso non será ata 2025 .
Entre agora e xuño de 2025, Parker completará 24 perihelios , movéndose entre Venus e logo virando dentro da coroa do Sol para obter as observacións máis próximas que xamais se teñan tomado da nosa estrela. O primeiro encontro de Parker co Sol comezará este mércores, o 31 de outubro, chegando ao seu primeiro perihelio o 5 de novembro.
