Únete á nosa canle de Whatsapp
Adoita acontecer nestas datas, mais non deixa de ser noticia, como sinal de chegada das estacións frías e húmidas, a primeira aparición da neve en Galicia. O descenso das temperaturas e a presenza de humidade das últimas xornadas fixo que esta mañá a paisaxe aparecese nevada nos puntos máis altos do país, como o macizo de Trevinca, a estación de Cabeza de Manzaneda ou os cumios máis altos das serras do Courel e Ancares.
Así o constatan as imaxes das estacións de MeteoGalicia en Lardeira (Carballeda de Valdeorras) ou o albergue de montaña dos Ancares (Cervantes), onde se viron este mercores as primeiras folerpas do outono. Foi máis tarde ca no 2020, cando a neve chegou a comezos de outubro, e un pouco antes ca en 2019, cando a neve tamén se retrasou ata novembro.
Tamén na estación de esquí de Cabeza de Manzaneda se observaron as folerpas.
A neve chega nun día no que a meirande parte de Galicia está a vivir temperaturas que non pasan dos 15ºC. E na pasada madrugada os termómetros caeron por baixo dos 0ºC na Veiga (-2,5ºC), Cabeza de Manzaneda (-2,2ºC) ou Lardeira (-1,3ºC).
