As patacas teñen lingua propia. Ou iso di a investigadora Lucía Martín Cacheda, finalista do certame de divulgación Yo investigo. Yo soy CSIC cun vídeo sobre a comunicación química entre as plantas, especialmente as de patacas, e a súa resposta ante a infección por patóxenos. O vídeo, titulado A lingua das patacas, céntrase en explicar a liña de investigación que Martín Cacheda desenvolve na Misión Biolóxica de Galicia (MBG) no grupo de Ecoloxía evolutiva das interaccións planta-hervíboro. Ademais, a científica de Lalín é a única finalista galega do certame, que pechará o seu prazo de votación popular este xoves 29 de febreiro. A lingua das patacas é un dos 29 vídeos finalistas do concurso nacional de divulgación que convoca o CSIC.
“Polo momento, comprobei que as plantas alertadas a través de compostos orgánicos volátiles (COVs) presentan unha maior resistencia (unha menor porcentaxe de dano) ante a praga de verme soldado (Spodoptera exigua). Este feito resulta interesante á hora de barallar a aplicación artificial de COVs como unha ferramenta de uso agrícola para loitar contra pragas de maneira máis sostible, reducindo o uso de pesticidas químicos”, explica a investigadora galega, graduada en Bioloxía pola Universidade de Santiago (USC) e científica da MBG dende 2020, onde traballa cun contrato predoutoral para a formación de doutores.
