Se alguén nos pregunta cal é o planeta que está máis preto da Terra, case todos responderíamos Venus ou Marte. Porque esta resposta encaixa coa lista dos planetas que aprendimos de nenos: “Mercurio, Venus, Terra, Marte, Xúpiter, etc…” Pero non é verdade. O planeta máis próximo á Terra agora mesmo é Mercurio. E para comprendelo temos que pensar no Sistema Solar, que está sempre en movemento.
Estamos afeitos a ver os planetas debuxados en liña recta, partindo do Sol, pero iso só é un xeito de representalos, que evidentemente non corresponde a ningunha situación concreta dunha data. Porque as distancias entre os planetas van cambiando. De feito, aínda que Marte e Venus sempre son debuxados como os noso veciños -un a cada lado- ás veces ningún dos dous é o máis próximo á Terra.
Podemos comprobalo agora mesmo co planisferio Solarsystemscope, un dos máis espectaculares e completos para ver o noso Sistema Solar dixitalmente. Ademais é de balde. Como podemos observar, Mercurio é o planeta que está hoxe máis achegado á Terra, por mor da súa órbita. Cando a Terra e Mercurio están máis preto, sitúanse a 77 millóns de quilómetros, mentres cando están moi lonxe (separados polo Sol, en medio deles) a distancia medra ata os 222 millóns de quilómetros.
O certo é que cada planeta ten un ritmo distinto de órbita, o percorrido dos planetas arredor do Sol. Iso implica que as distancias entre eles van cambiando. Agora o máix próximo é Mercurio, pero noutros momentos pode ser Venus ou Marte. Aínda que tamén podemos sacar unha media e calcular que planeta realmente pasa máis tempo preto da Terra.
A canle británica BBC fixo recentemente este cálculo nun programa de divulgación científica. Estimaron cal planeta estivo máis preto de nós cada día dos últimos 50 anos. E o noso veciño máis próximo habitual foi… Mercurio.
David A. Rothery, profesor de xeociencias planetarias na Open University, explicouno á BBC: “A orde dos planetas, desde o Sol, é: Mercurio, Venus e logo a Terra. Pero cando Venus está do outro lado do Sol está moi lonxe de nós”, explicou Rothery: “Así que aínda que a órbita de Venus fai que ese planeta sexa o que máis se pode achegar a nós, seguida -en segundo lugar- pola órbita de Marte, ás veces o planeta vermello está moi preto da Terra, mentres que a distancia con Venus é enorme”.
“E, aínda que Marte é o segundo potencialmente máis próximo de nós, entre todos os demais, o planeta que pasa o maior tempo próximo á Terra é Mercurio“, confirmou o astrofísico.
Estes son os datos: No último medio século, Mercurio foi o máis próximo á Terra o 46% do tempo. Venus, saíu segundo: pasou o 36% do tempo como o noso veciño máis achegado. Mentres que Marte, o planeta vermello, que moitos asumen como o máis próximo á Terra, estivo nese lugar apenas o 18% do tempo.
Pero por riba de medias, hai momentos nos que Mercurio é directamente o noso veciño máis achegado. Aínda que contraveña o que estudamos no colexio. Asi acontece agora.
E podes botar unha ollada se queres para comprobalo no planetario en liña de Solar System Scope.
