No mes de xaneiro, en plena escalada de restricións por unha nova vaga da pandemia da Covid-19, os afeccionados á astrofotografía tiñan importantes limitacións para desprazarse a ceos ‘limpos’ de contaminación luminosa. Mais iso non impediu a Fins Eirexas captar desde Vidán, nas aforas de Santiago de Compostela, unha fotografía que acaba de ser seleccionada como unha das 150 finalistas do Astronomy Photographer of the Year, un dos certames de astrofotografía máis prestixiosos do planeta, que convoca Royal Museums Greenwich, a institución londinense que acolle catro dos museos desta localidade da contorna da capital británica, onde se atopa o Real Observatorio.
A imaxe de Eirexas, que titulou Ikebana, en referencia á arte floral xaponesa, amosa as galaxias de Andrómeda (M31) e do Triángulo (M33) dúas das máis brillantes no ceo terrestre. No centro, tamén brillante, obsérvase a estrela de Mirach, unha das máis visibles da constelación de Andrómeda. E en primeiro termo (de aí a referencia a Ikebana), os garabullos nus dun carballo. “Apetecíame facer unha composición minimalista, e como no inverno a galaxia de Andrómeda está moi baixa, pensei en compoñer a imaxe como se as estrelas fosen as flores do arranxo floral, buscando esa simetría”, explica o autor da foto. A obra de Fins Eirexas amosarase na exposición de Greenwich xunto a todas as fotos finalistas, e incluirase no libro que todos os anos recolle as mellores imaxes presentadas ao certame.
Un orgullo que o meu cromo das galaxias M31 e M33 nos @CeosGalegos durante o confinamento fora escollido entre as finalistas do concurso Astronomy Photographer of the Year do @RMGreenwich
Máis en https://t.co/66Mr0YddBD#APY13 pic.twitter.com/JM2wBbPewa
— O’Fins (@OFinsGZ) June 29, 2021
Eirexas explica que a técnica para obter esta imaxe foi “sinxela, con materiais non específicos da astrofotografía”. Nos últimos anos, Fins Eirexas acadou varios recoñecementos en certames como o de Ceos Galegos, que reúne a afeccionados galegos á astrofotografía. E tamén captou recentemente outros curiosos fenómenos en Galicia, como o do mar de ardora, o pasado verán, na praia de Carnota.
O certame Astronomy Photographer of the Year tamén contou nos últimos anos coa presenza como finalistas de varios autores galegos, comoDani Caxete ou Carlos F. Turienzo.
