A eclipse total de Lúa de xaneiro de 2019 xa pasou á historia. Por primeira vez, os astrónomos e observadores de eclipses de todo o mundo viron cascallos espaciais, probablemente un meteoroide, que se estrelou contra a superficie lunar cando atravesaba a sombra da Terra.
Tal escena foi buscada durante moito tempo polos astrónomos, pero demostrou ser difícil de alcanzar ata agora, mesmo sendo frecuentes as eclipses lunares. Aínda que os meteoroides se filmaron antes impactando contra o noso satélite natural, as eclipses lunares adoitan ser demasiado brillantes.
Pero un científico español, José María Madiedo, do programa do Sistema de Detección e Análise de Impactos na Lúa (MIDAS) da Universidade de Huelva, non deixou nada ao azar esta vez. Dobrou a cantidade de telescopios que o programa xeralmente apunta á Lúa, de catro a oito, e cruzou os dedos.
“Tiña a sensación de que esta vez sucedería”, díxolle a New Scientist. “Estaba moi, moi feliz cando aconteceu”. Captouno todo, pero non foi o primeiro en anuncialo. Quizais debido a que o impacto foi nunha rexión máis escura da superficie lunar, outros observadores tamén captaron o escintileo brillante, e publicaron a nova de xeito especulativo en Reddit antes da confirmación de Madiedo o luns.
Nun vídeo do Observatorio Griffith , o impacto, visible como un breve escintileo brillante, acontece na parte inferior esquerda da Lúa. Tamén se pode ver na parte superior esquerda nunha transmisión en vivo dun astrónomo afeccionado en Pennsylvania.
Aínda que o impacto produciu un escintileo bastante brillante, a roca en si probablemente non era moi grande. Dacordo coas estimacións preliminares de Madiedo, probablemente só roldaba os 2 quilogramos (4,4 libras) en masa, e aproximadamente o tamaño dun balón de fútbol.
